Սերժ Սարգսեան. «Ինծի Համար Իրաւապահ Համակարգը Իրաւապաշտպան Բնոյթ Ունի»

0
107

Նախագահ Սերժ Սարգսեան երէկ գլխաւոր դատախազութեան կեդրոնին մէջ մասնակցած է դատախազութեան աշխատողի օրուան նուիրուած հանդիսաւոր նիստին, ուր հանդէս եկած է ելոյթով:

Իր խօսքին մէջ հանրապետութեան նախագահը անդրադարձած է կառավարման նոր համակարգին եւ պետական իշխանութեան մարմիններու նոր յարաբերակցութեան պայմաններուն մէջ հանրապետութեան իրաւապահ համակարգի յենասիւներէն մէկուն` դատախազութեան դերակատարութեան, մինչեւ այսօր ունեցած ձեռքբերումներուն, յառաջիկայ ընելիքներուն, ինչպէս նաեւ ներկաներուն ուշադրութիւնը հրաւիրած է դատախազութեան գործառոյթներու հետ անմիջականօրէն կապուած առանձին խնդրայարոյց երեւոյթներու վրայ:

«Ձեր գործունէութիւնը շատ կարեւոր է պետութեան եւ հասարակութեան համար: Անիկա նոյնչափ պատասխանատու է, քանի որ ձեր որոշումները կրնան մարդուն ճակատագիրը փոխել` բառին ամէնէն ուղղակի իմաստով», ըստ նախագահի կայքին, դիմելով դատախազներուն ըսած է նախագահ Սերժ Սարգսեան եւ շարունակած. «Ինծի համար իրաւապահ համակարգը իրաւապաշտպան բնոյթ ունի: Բովանդակային առումով ես զանոնք հոմանիշներ կը նկատեմ: Եթէ կ՛ուզենք մօտ ապագային Հայաստանի մէջ թեթեւցնել իրաւունքները պաշտպանողի հոգերը, ապա մեր ջանքերը պէտք է ուղղենք մէկ նպատակի` իրաւունքը պահպանողի գործունէութեան մէջ որակական նոր մակարդակի բարձրացնել անձի, հասարակութեան եւ պետութեան շահերու պաշտպանութիւնը: Անոր գրաւականը ուժեղ եւ պատասխանատուութենէ չխուսափող, իրաւունքի գերակայութեան սկզբունքով աշխատող կուռ եւ գործակցող իրաւապահ համակարգն է: Այդ համակարգին յենասիւներէն մէկը, անշուշտ, դատախազութիւնն է` պատմականօրէն ինքնատիպ իր կարգավիճակով»:

Նախագահ Սարգսեան ներկաներուն ուշադրութիւնը հրաւիրած է դատախազութեան գործառոյթներուն հետ անմիջականօրէն կապուած «քանի մը խնդրայարոյց երեւոյթներու վրայ», որոնց մէկ մասը «իրաւական հոլովոյթներու շրջագիծին մէջ քննարկման առարկայ կը դառնայ նոյնիսկ միջազգային դատական ատեաններուն մէջ: Վստահ եմ` կը հասկնաք, որ նկատի ունիմ Մարդու իրաւունքներու եւրոպական դատարանը», ընդգծած է նախագահը:

«Ես արդէն առիթ ունեցած եմ ըսելու, որ անարդարութիւնը մեր թիւ մէկ թշնամին է, եւ մենք պատերազմ յայտարարած ենք անարդարութեան դէմ: Այդ պատերազմին մէջ մենք պարտաւոր ենք յաղթել` չէզոքացնելով անտարբերութեան ամէն դրսեւորում, վերացնելով փտածութեան որեւէ երեւոյթ», իր ելոյթին մէջ ըսած է նախագահ Սարգսեան` աւելցնելով. «Անարդար դատախազը վնասաբեր է թէ՛ դատախազութեան, թէ՛ այն կառոյցին, որ դատախազութեան վերապահուած լիազօրութիւններուն ուժով անոր ազդեցութեան գօտիին մէջ է»:

«Մեր երկիրը մտած է բեկումնային նոր ժամանակաշրջան: Միասին պիտի կառուցենք պետական կառավարման նոր կարգը: Ապրիլեան ընտրութիւններէն առաջ մենք ըսած էինք, որ վճռական ենք կազմակերպելու լաւագոյն չափանիշներուն համապատասխանող ընտրութիւններ: Արդէն կարելի է փաստել, որ յաջողած ենք»:

LEAVE A REPLY

Please enter your comment!
Please enter your name here