ԹՈՒՐՔԻՈՅ ԽՈՐՀՐԴԱՐԱՆԻ ՍԱՀՄԱՆԱԴՐԱԿԱՆ ՅԱՆՁՆԱԺՈՂՈՎԸ ԸՆԴՈՒՆԵՑ «ՑԵՂԱՍՊԱՆՈՒԹԻՒՆ» ԵԶՐՈՅԹԸ ԱՐԳԻԼՈՂ ՕՐԷՆՔՆԵՐՈՒ ԾՐԱՐԸ

0
156

Թուրքիոյ խորհրդարանի սահմանադրական յանձնաժողովը ընդունեց իշխող Արդարութիւն եւ Բարգաւաճում կուսակցութեան եւ անոր հետ համագործակցող Ազգային Շարժում կուսակցութեան ներկայացուցած, խորհրդարանի ներքին կանոնագիրքին մէջ փոփոխութիւններ նախատեսող օրէնքներու ծրարը:

Թուրքիոյ քրտամէտ Ժողովուրդներու Դեմոկրատական կուսակցութեան անդամները մերժեցին մասնակցիլ քուէարկութեան՝ քննարկումները կատարելու մէջ որեւէ իմաստ չտեսնելու պատճառով:
Թուրքիոյ խորհրդարանի սահմանադրական յանձնաժողովին ներկայացուցած ծրարը պատիժ կը սահմանէ այն երեսփոխաններուն համար,որոնք կը վիրաւորեն «թուրք ազգի պատմութիւնն ու անցեալը», «1915 թուականի դէպքերու մասին» խօսելու ընթացքին կ’օգտագործեն « Ցեղասպանութիւն» եզրոյթը: Արգիլուած է նաեւ խորհրդարանի ամպիոնէն օգտագործել « Քիւրտիստան», «քրտական նահանգներ» եզրոյթները:
Օրէնքը խախտող երեսփոխանները ժամանակաւորապէս պիտի արգիլուի մասնակցիլ խորհրդարանի նիստերուն,ինչպէս նաեւ պիտի կրճատուի անոնց աշխատավարձին 1/3-ը, որ կը կազմէ 12 հազար թրքական լիրա(աւելի քան երեք հազար ամերիկեան տոլար):
Փոփոխութիւններու այս ծրարին դէմ խօսեցան Քեմալական Հանրապետական Ժողովրդային կուսակցութեան եւ քրտամէտ Ժողովուրդներու Հանրապետական կուսակցութեան անդամներ:
Հայ երեսփոխան Կարօ Փայլան, որ 2017 թուականին պատժուած էր, խորհրդարանին մէջ Հայոց Ցեղասպանութեան մասին խօսելու պատճառով, փոփոխութիւններու ծրարը անուանեց « Ազգայնական միապետութեան դաշինք ստեղծելու առաջակ»:
Քեմալական կուսակցութեան հայ երեսփոխան Սելինա Տողան նշեց, թէ փոփոխութիւններու միջոցով կը փորձուի լռութեան մատնել խորհրդարանի փոքրամասնութիւններուն ձայնը: «Անկասկած, ոչ ոք պէտք է վիրաւորէ թուրք ժողովուրդին պատմութիւնը եւ անցեալը: Սակայն ի՞նչ պիտի ըսէք միւս ազգերուն համար: Օրինակ հայ ժողովուրդի պատմութիւնը կարելի՞ է վիրաւորել». հարց տուաւ ան:

LEAVE A REPLY

Please enter your comment!
Please enter your name here