60 ՀԱԶԱՐ ԱՇԱԿԵՐՏ ՏԱՐԵԿԱՆ 180 ՕՐ ՊԻՏԻ ՍՏԱՆԱՆ ՈՒՏԵԼԻՔ

0
171

Կրթութեան եւ գիտութեան նախարար Լեւոն Մկրտչեան եւ ՄԱԿ-ի Պարէնի համաշխարհային ծրագիրի հայաստանեան ներկայացուցչութեան ղեկավար Փասքալ Միշօ համաձայնագիր ստորագրեցին՝ Հայաստանի մէջ «Կայուն դպրոցական սնունդ» ծրագիրի շարունակականութեան ապահովման վերաբերեալ:

Սոյն ծրագիրի գործողութեան ժամկէտը աւարտած էր 30 Յունիս 2017-ին: Այս համաձայնութեամբ՝ ծրագիրը կ՛երկարաձգուի մինչեւ 31 Դեկտեմբեր 2018:
Նախարարը տեղեկացուց, որ Հայաստանի կառավարութիւնը ինք եւս ստեղծած է «Կայուն դպրոցական սնունդ» հիմնադրամ մը, որ այսուհետեւ պիտի համակարգէ դպրոցական ուտելիքի կազմակերպման աշխատանքները՝ առաջնահերթ նկատելով առաջինէն չորրորդ դասարանցիներուն տաք ուտելիքի ապահովումը, ինչպէս նաեւ ծրագիրի ազգային փուլի ընդլայնումը:
«Կայուն դպրոցական սնունդ» ծրագիրը մեկնարկած է 2010-ին, Հայաստանի կառավարութեան եւ ՄԱԿ-ի Պարէնի համաշխարհային ծրագիրին միջեւ ձեռք բերուած պայմանաւորուածութեամբ, որուն ծիրին մէջ Հայաստանի բոլոր մարզերու (Երեւանը ծրագրին մաս չի կազմեր) տարրական դասարաններու աշակերտները իրենց դպրոցներուն մէջ կը ստանան ուտելիք:
2014-2015-ին Արարատի, Վայոց Ձորի եւ Սիւնիքի մարզերու բոլոր դպրոցները ներառնուած են Կառավարութեան «Կայուն դպրոցական սնունդ» ծրագիրին մէջ: Սեպտեմբեր 2017-ին Տաւուշի մարզն ալ պիտի ընդգրկուի ծրագիրին մէջ:
Սեպտեմբեր 2018-ին ծրագիրի ազգային փուլին մէջ պիտի ընդգրկուի Շիրակը, իսկ մնացեալ 5 մարզերու դպրոցական ուտելիքի ծրագիրը պիտի իրագործուի Պարէնի համաշխարհային ծրագիրի ֆինանսական աջակցութեամբ:
ՄԱԿ-ի Պարէնի համաշխարհային ծրագիրի հայաստանեան ներկայացուցչութեան ղեկավար Փասքալ Միշօ տեղեկացուց, որ Հայաստանի դպրոցներուն համար ուտելիք կը տրամադրէ Ռուսիան:
Այս տարուան համար, ծրագիրի թիրախը նախակրթարաններու եւ մանկապարտէզի դասարաններու 60,000 աշակերտներն են, որոնց տարեկան 180 օր պիտի տրամադրուի ուտելիք:

LEAVE A REPLY

Please enter your comment!
Please enter your name here