Գերմանիոյ Նախագահը Կը Զօրակցի Թուրքիոյ Դէմ Քայլերուն

0
146

ՊԵՐԼԻՆ, «Ռոյթըրզ».- Գերմանիա-Թուրքիա դիւանագիտական յարաբերութիւնները կը շարունակեն վատթարանալ, յատկապէս շարք մը իրաւապաշտպաններու, ներառեալ՝ գերմանացիի մը, ձերբակալութենէն ետք, որ «յորդեցուց» Գերմանիոյ իշխանութիւններուն համբերութիւնը։

Գերմանիան, խօսքէն գործի անցնելով՝ անցեալ շաբաթ առկախեց Թուրքիոյ հետ իր ռազմարդիւնաբերական բոլոր ծրագիրները։ Այս յայտարարութիւններուն փոխադարձելով՝ Թուրքիա Պերլինին կոչ ուղղեց չմիջամտելու Թուրքիոյ ներքին գործերուն, յատկապէս՝ դատական-իրաւական համակարգին, եւ նշուեցաւ, որ իրաւական բոլոր նախադրեալները գոյութիւն ունէին՝ գերմանացի իրաւապաշտպանը ձերբակալելու համար։

Նախագահ Էրտողան նոյնիսկ դատապարտեց Գերմանիոյ վարչապետ Անկելա Մերքելի ու արտաքին գործոց նախարար Զիկմար Կապրիէլի յայտարարութիւնները, որոնք, ըստ նախագահին՝ շատ հեռու են իրականութենէն։ Էրտողան ըսաւ, որ գերմանական կողմը իրաւունք չունի միջամտելու Թուրքիոյ «ժողովրդավար համակարգի ներքին գործերուն»։

Փոխադարձ մեղադրանքները շարունակուեցան, եւ այս անգամ Գերմանիոյ նախագահ Ֆրանք Վոլթեր Շթայնմայէրն էր, որ հարցազրոյցի մը ընթացքին ըսաւ, թէ ամբողջովին կը զօրակցի իր կառավարութեան կողմէ Թուրքիոյ դէմ որդեգրուած քայլերուն։

Շթայնմայէր դատապարտեց Էրտողանը՝ ըսելով, որ բազմաթիւ անձեր, որոնք նախապէս Էրտողանի կուսակցութեան կ՛անդամակցէին ու կ՛աշխատէին կառավարութեան հետ, ներկայիս կա՛մ լքած են երկիրը, կա՛մ ձերբակալուած են, կամ ալ վախէն չեն բանար իրենց բերանը։

«Պէտք է յստակ կերպով՝ կա՛նգ առ ըսենք Թուրքիոյ, եւ պէտք է ցոյց տանք, որ կը յարգենք մեր երկրին արժանապատուութիւնը», յայտարարեց Գերմանիոյ նախագահը։ Ան նաեւ պնդեց, որ կիւլենականներուն դէմ պայքարին գծով բոլոր ընդդիմադիրները կը հետապնդուին ու կը դատապարտուին՝ առանց յստակ մեղադրանքներու, այսինքն՝ քաղաքական հաշուեայարդար կը կատարուի։

Միւս կողմէ, Գերմանիոյ արտաքին գործոց նախարար Կապրիէլ, գերմանաբնակ թուրքերուն ուղղուած նամակով մը շեշտեց, թէ գերմանացիներու ձերբակալութիւններուն իբրեւ հետեւանք՝ Գերմանիա ստիպուած է Թուրքիոյ դէմ այս քայլերուն դիմելու։

LEAVE A REPLY

Please enter your comment!
Please enter your name here