Ամերիկայի Եւ Հայաստանի Միջեւ Տնտեսական Գործակցութիւնը Սերտացնելու Նպատակով Քննարկումներ Գոնկրեսի Մէջ

0
103

ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը տեղեկացնէ, թէ 25 Յուլիս ին, Գոնկրեսին մէջ քանի մը առիթներով քննարկութեան նիւթ դարձած է Միացեալ Նահանգներու եւ Հայաստանի միջեւ տնտեսական գործակցութիւնը սերտացնելու կարեւորութիւնը։

Արդարեւ, Միացեալ Նահանգներու գանձարանի տուրքերուն հարցերով փոխնախարար նշանակուած Տէյվիտ Քոթըր, Ծերակոյտին մէջ իր վկայութեան ընթացքին ընդունած է, որ Ամերիկայի եւ Հայաստանի միջեւ կրկնակի տուրքերէ խուսափելու համաձայնագիր մը պէտք է մշակուի՝ զարկ տալու համար երկկողմանի առեւտրական յարաբերութիւններուն։
Ան այս հաստատումը կատարած էր՝ պատասխանելով ծերակուտական Ռոպըրթ Մենենտեզի հարցումին։
Աւելի կանուխ, արտաքին գործոց նախարարի օգնականի պաշտօնակատար Ճոն Հեֆըրն, պատասխանելով գոնկրեսական Պրետ Շըրմընի մէկ հարցումին՝ յայտնած էր, թէ նման համաձայնագիր մը արդէն իսկ կը քննարկուի արտաքին գործոց նախարարութեան կողմէ։
Հեֆըրն, որ Հայաստանի մէջ Միացեալ Նահանգներու դեսպան եղած է նախապէս, նաեւ ընդունած էր, որ մեծ ներուժ կայ երկու երկիրներու տնտեսական յարաբերութեանց մէջ, եւ աւելցուցած, թէ մարդասիրական օգնութիւն տրամադրելու փոխարէն՝ Միացեալ Նահանգները կը փափաքի Հայաստանի հետ առեւտրական յարաբերութիւնները զարգացնել: Ան նաեւ նշած էր, որ 2015-ի Մայիսին կնքուած հայ-ամերիկեան առեւտուրի եւ ներդրումներու պայմանագիրը արդէն իսկ կը նպաստէ երկու պետութիւններուն միջեւ տնտեսական յարաբերութիւններու զարգացման:

LEAVE A REPLY

Please enter your comment!
Please enter your name here