Դիմադրութիւնը Ազատագրեց Արսալի Բարձունքներուն 93 Առ Հարիւրը, Իսկ Մնացեալ 7 Տոկոսին Ազատագրումը Լիբանանեան Բանակին Պատասխանատուութիւնն Է

0
126

Ժապհաթ Նուսրայի կողմէ վեց տարիէ ի վեր բռնագրաւուած Ասրալի բարձունքներու ազատագրման ճակատամարտը, որ վեց օր առաջ սկսաւ Հըզպալլայի եւ լիբանանեան բանակին կողմէ, երէկ շարունակուեցաւ` յաւելեալ զոհեր եւ նիւթական վնասներ պատճառելով, ինչպէս նաեւ աշխարհագրական նեղ դիրքի մը` Հմայտ հովիտին եւ Մալահիի մէջ շրջափակելով ահաբեկիչներուն մնացորդացը:

Դիմադրութեան մարտիկները երէկ հասան Հմայտ հովիտի մուտքին եւ ռմբակոծեցին զինեալներուն կեդրոնները, որոնք կը գտնուին Հմայտ հովիտին հարաւ-արեւելքը:
Դիմադրութեան պատերազմական աղբիւրները շեշտեցին, որ իրենք բնաւ ռմբակոծումի թիրախ չեն դարձներ քաղաքայինները` աւելցնելով, որ Դիմադրութեան մարտիկները Հմայտ հովիտ եւ Մալահի մուտք պիտի չգործեն:
Դիմադրութեան մարտիկները հաստատեցին, որ այն շրջանները, ուր քաղաքայիններ կան, լիբանանեան բանակին պատասխանատուութիւնն են:
Յետմիջօրէին Դիմադրութեան սակրաւորները վնասազերծեցին Արսալի բարձունքներուն վրայ Ժապհաթ Նուսրայի լարած ականները:
Մինչեւ երեկոյեան ժամը 7:00 հաստատուեցաւ, որ Հըզպալլան արդէն իսկ ազատագրած է Արսալի բռնագրաւուած բարձունքներուն 93 առ հարիւրը` աւելցնելով, որ տակաւին բռնագրաւուած կը մնայ միայն 7 առ հարիւրը:
«Դիմադրութեան կողմէ Արսալի բարձունքներուն ազատագրման նպատակն է լիբանանեան բանակի նահատակներուն վրէժը լուծել», հաստատեց Հըզպալլայի տեղեկատու աղբիւրը` աւելցնելով, որ Դիմադրութեան մարտիկները Հմայտ հովիտին դիմաց գտնուող բարձունքներուն վրայ Հըզպալլայի եւ Լիբանանի դրօշներուն կողքին բարձրացուցած են նաեւ ահաբեկչութեան դէմ պայքարի ընթացքին զոհուած բանակայիններուն լուսանկարները:
Դիմադրութեան աղբիւրներ երէկ առաւօտեան յայտնեցին, որ Ժապհաթ Նուսրայի զինուորական գործողութիւնները ղեկավարող Ամմար Ուարտի ծանրօրէն վիրաւորուած է Դիմադրութեան մարտիկներուն փամփուշտով:
Ժապհաթ Նուսրայի էմիր Ապու Մալեք Թալլիի գտնուած վայրին մասին շրջանառութեան մէջ դրուեցան երկու վարկածներ, որոնցմէ առաջինին համաձայն, ան կը գտնուի Հմայտ հովիտին մէջ, որովհետեւ Սարայա ահըլ շամը կ՛արգիլէ անոր մուտքը Մալահի շրջան:
Իսկ երկրորդ վարկածին համաձայն, Թալլի եւ անոր ընկերակցող 15 ահաբեկիչներ երկու օրէ ի վեր կորսուած են եւ անոնց հետ կապեր չկան:
Երեկոյեան ժամը 7:00-էն ետք սուրիական օդուժը ռմբակոծեց Զամարանիի անցքը, իսկ լիբանանեան բանակը ռմբակոծեց արեւելեան լեռնաշղթան` արգիլելու համար ահաբեկիչներուն կատարելիք ներթափանցման փորձերը:

Լիբանանեան բանակը զինուորական խիստ միջոցառումներ որդեգրեց Քաայի եւ Ռաս Պաալպեքի մօտակայքը գտնուող իր դիրքերուն շուրջ:
Անպաշտօն աղբիւրներ նշեցին, որ լիբանանեան բանակը կը պատրաստուի ՏԱՀԵՇ-էն ազատագրել Քաայի եւ Ռաս Պաալպեքի բարձունքները:
Պաալպեք-Հերմելի յոյն կաթողիկէ համայնքի առաջնորդ Էլիաս Ռահհալ եպիսկոպոս շեշտեց, որ ինք կը խոնարհի ահաբեկչութեան դէմ մղուած պատերազմի ընթացքին թափած արեան իւրաքանչիւր կաթիլի դիմաց` մաղթելով, որ Լիբանանի բարձունքներուն վրայ Դիմադրութեան սկսած պատերազմը շարունակուի հասնելով մինչեւ Ռաս Պաալպեքի եւ Քաայի բարձունքներ:
Նշենք, որ Նապաթիէի մէջ սկսաւ ժողովրդային արշաւ մը` առ ի զօրակցութիւն Արսալի բարձունքներուն վրայ կռուող Դիմադրութեան մարտիկներուն:
Նապաթիէի բնակիչները նախաձեռնեցին մարտիկներուն սննդեղէն ապահովելու արշաւի մը:
Միւս կողմէ, նախկին Առաջին տիկին Անտրէ Լահուտ մասնակցեցաւ Սէյիտ Շուհատա համալիրին մէջ տեղի ունեցող Դիմադրութեան մարտիկներուն համար ճաշի պատրաստութեան աշխատանքին:

LEAVE A REPLY

Please enter your comment!
Please enter your name here