Տիարպեքիրի Մէջ Ցեղասպանութեան Օրէնքին Դէմ Նստացոյցին Կը Միանայ Կարօ Փայլան

0
145

Թուրքիոյ ընդդիմադիր եւ քրտամէտ Ժողովուրդներու ժողովրդավարական կուսակցութեան անդամ պատգամաւոր Կարօ Փայլան, իր կուսակիցներուն հետ, Տիարպեքիրի մէջ կը մասնակցի անցեալ շաբաթ, Թուրքիոյ խորհրդարանին կողմէ ընդունուած ներքին կանոնակարգի ծրարին դէմ իրականացուող նստացոյցին:

Ըստ Փայլանի՝ ոստիկանները կը գործեն իրենց տրամադրութեամբ:

Նշենք, որ Թուրքիոյ խորհրդարանը ընդունեց խորհրդարանի ներքին կանոնակարգին մէջ փոփոխութիւններ նախատեսող օրէնքներու ծրար մը, որով այսուհետեւ պիտի արգիլուի խորհրդարանի ամպիոնէն օգտագործել «Հայոց Ցեղասպանութիւն» եզրը: Օրէնքներու ծրարին կողմ քուէարկած են իշխող Արդարութիւն եւ բարգաւաճում կուսակցութիւնը եւ անոր հետ համագործակցող Ազգայնական շարժում կուսակցութիւնը: Ընդդիմադիր քեմալական Հանրապետական ժողովրդական կուսակցութիւնը եւ քրտամէտ Ժողովուրդներու ժողովրդավարական կուսակցութիւնը դէմ քուէարկած են փոփոխութիւններուն:

Ընդունուած օրէնքներու ծրարը կ՛ենթադրէ պատիժ սահմանել այն պատգամաւորներուն համար, որոնք կը վիրաւորեն «թուրք ազգի պատմութիւնն ու համատեղ անցեալը»: Իբրեւ «վիրաւորանք» պիտի ընկալուի «1915 թուականի դէպքերու մասին» խօսելու ատեն «Հայոց Ցեղասպանութիւն» եզրի կիրառումը: Արգելքը պիտի վերաբերի նաեւ խորհրդարանի ամպիոնէն «Քիւրտիստան», «քրտական նահանգներ» եզրերը արտայայտելուն:

Լրատուամիջոցներու հետ զրոյցներու ընթացքին Կարօ Փայլան կը պատմէ, որ բացօթեայ նստացույցին ինքզինք շատ աւելի լաւ կը զգայ, քան խորհրդարանին մէջ:

«Բաց երկինքի տակ քնանալը հրաշալի բան է», կ՛ըսէ հայ պատգամաւորը:

Ան նաեւ կը յայտնէ, որ ոստիկանները պարբերաբար կը խոչընդոտեն իրենց այցելել ուզող քաղաքացիներու մուտքը նստացոյցի համար յատկացուած տարածք:

«Երբեմն մեր ծածկոցներն ու ուտելիքը մեզի հասցնելու համար մեր ընկերները հարցեր կ՛ունենան: Որեւէ ձեւաչափ չկայ, ոստիկանները կը գործեն իրենց տրամադրութեամբ», կը պատմէ Փայլան:

Յիշեցնենք, որ Կարօ Փայլան ամիսներ առաջ խորհրդարանին մէջ, սահմանադրական փոփոխութիւններուն վերաբերեալ նախագծիի քննարկման ատեն «ցեղասպանութիւն» եզրի արտայայտման պատճառաւ զրկուած էր 3 նիստերու մասնակցելու իրաւունքէն:

LEAVE A REPLY

Please enter your comment!
Please enter your name here