Արսալ Մաքրուեցաւ Ժապհաթ Նուսրայի Զինեալներէն

0
167

2 օգոստոս 2014-ին Արսալ ներխուժած ու լիբանանեան բանակին դէմ յարձակումներ գործած Ժապհաթ Նուսրայի ահաբեկիչները ճիշդ երեք տարի ետք հեռացան Լիբանանէն:

Արսալէն հեռանալու անոնց պահանջը սակայն ազատ կամքի արտայայտութիւն չէր, այլ` մահէն փրկուելու վերջին փորձ մը, նկատի ունենալով Արսալի բարձունքներուն վրայ անոնց կրած ջախջախիչ պարտութիւնը` Դիմադրութեան մարտիկներուն կողմէ:

Երէկ յետմիջօրէին Ժապհաթ Նուսրայի զինեալները, անոնց ընտանիքներն ու հետեւորդները, որոնք կը հաշուէին 7700 հոգի, 113 պասերով փոխադրուեցան Իտլիպ:

Պասերը կէս գիշերին հասան Ֆլիթա, ուրկէ անոնք պիտի ուղղուէին դէպի Իտլիպ:

Այս ձեւով Արսալ մաքրուեցաւ Ժապհաթ Նուսրայի զինեալներէն, իսկ լիբանանեան բանակը սկսաւ դիրքաւորուիլ Հմայտ հովիտին եւ Մալահի շրջանին մէջ` Ժապհաթ Նուսրայի դիրքերուն վրայ ապահովական գործողութիւններ կատարելէ ետք:

Անոնց հեռացումի գործողութեան հսկեցին Ընդհանուր ապահովութեան ուժերը, Դիմադրութեան մարտիկներն ու Լիբանանի Կարմիր խաչը, ինչպէս նաեւ սուրիական ուժերն ու Սուրիոյ Կարմիր մահիկը:

Լիբանանեան Կարմիր խաչի 17 հիւանդատարներ Ժապհաթ Նուսրայի վիրաւորները յանձնեցին Սուրիոյ Կարմիր մահիկին:

Անհրաժեշտ է նշել, որ լիբանանեան բանակը Ժապհաթ Նուսրայի զինեալները դէպի պաս փոխադրելու ընթացքին, անոնցմէ մէկուն վրայ բացայայտեց ականուած գօտի մը, որ գրաւուեցաւ եւ խնդրոյ առարկան յանձնուեցաւ Լիբանանի Կարմիր խաչին` Իտլիպ փոխադրութեան նպատակով:

Միւս կողմէ, Ժապհաթ Նուսրայի պարտուած էմիր Ապու Մալեք Թալլի նախքան պաս ուղղուիլը սպաննեց Իտլիպ ուղղուող զինեալներէն Ռաատ Ամուրին` զայն ՏԱՀԵՇ-ի հետ մեղսակցութեան յանցանքով ամբաստանելով:

Նշենք, որ յառաջիկայ 48 ժամերուն ընթացքին Սարայա ահըլ շամ կազմակերպութեան զինեալներ, իրենց ընտանիքներով (շուրջ երեք հազար հոգի) պիտի ուղղուին դէպի Իտլիպ:

Հարիրի. «Լիբանանի Մէջ Ահաբեկչութեան
Որեւէ Տեսակի Գոյութիւն Մերժելի Է»

Երեկոյեան ժամը 6:00-ին վարչապետ Սաատ Հարիրի վարչապետարանին մէջ ընդունեց Ընդհանուր ապահովութեան ուժերու ընդհանուր տնօրէն հազարապետ-զօրավար Ապպաս Իպրահիմը, որուն հետ քննարկեց Արսալի վիճակը եւ Ժապհաթ Նուսրայի զինեալներուն Լիբանանէն հեռացումը ապահովող բանակցութիւններուն մանրամասնութիւնները:

Հանդիպումէն ետք Հարիրի շեշտեց, որ Լիբանանի մէջ ահաբեկչութեան որեւէ տեսակի գոյութիւն մերժելի է` աւելցնելով, որ լիբանանեան պետութիւնը իր պարտականութիւնը կատարած է եւ Ժապհաթ Նուսրայի հետ բանակցութիւնը ապահոված:

«Այս հարցը կրցանք լուծել եւ նոյն թափով պիտի շարունակենք նաեւ ՏԱՀԵՇ-ի հետ», ըսաւ ան:

Հարիրի նշեց, որ կառավարութեան այսօրուան նիստին ընթացքին Արսալը քննարկումի օրակարգին վրայ պիտի գտնուի` աւելցնելով, որ լիբանանեան պետութիւնն է, որ ազատագրած է Արսալը: «Բանակը պիտի դիրքաւորուի ամբողջ Արսալի տարածքին, ինչ որ Արսալի եւ բոլոր լիբանանցիներուն ապահովութեան կը ծառայէ: Երբ ահաբեկչութիւնը ամբողջ երկրին կը սպառնայ, այս կամ այն կողմին կեցուածքներն ու անոնց մանրամասնութիւնները պէտք չէ նկատի ունենալ, այլ` պէտք է փնտռել եւ կառչիլ այնպիսի կեցուածքներու, որոնք մեզ կը միացնեն», շեշտեց վարչապետը:

Հարիրի հաստատեց, որ Լիբանանի կառավարութիւնը ճիգ չի խնայեր նաեւ լուծելու ՏԱՀԵՇ-ի մօտ գտնուող առեւանգուած բանակայիններուն թղթածրարը:

LEAVE A REPLY

Please enter your comment!
Please enter your name here