Արտասահմանեան Ներդրումները Աւելցած Են Հայաստանի Մէջ

0
141

ԵՐԵՒԱՆ, «Նիուզ».- Ներդրումային դաշտի օրէնսդրական բարեփոխումները եւ միջազգային բեմերու վրայ երկրի ճանաչելիութեան բարձրացումը նպաստած են Հայաստանի մէջ արտասահմանեան ներդրումներու հոսքի աւելացման:

Արտասահմանեան ուղղակի ներդրումներու ծաւալը Հայաստանի մէջ, 2017-ի առաջին եռամսեակին աւելցած է 4,84 միլիառ դրամով՝ կազմելով 19,7 միլիառ դրամ:

Պաշտօնական տուեալներով՝ առաջին եռամսեակին առաւել շատ ներդրումներ եղած են տեղեկատուութեան եւ կապի, մշակուող արդիւնաբերութեան, հանքարդիւնաբերութեան եւ ուժանիւթի ոլորտներէն ներս:

Հայաստանի տնտեսական զարգացման եւ ներդրումներու ներգրաւման եւ համակարգման վարչութեան պետ Վահագն Լալայեան «Արմէնփրէս»ի թղթակիցին յայտնած է, որ վերջին տարիներու ամէնէն մեծ ներդրումները եկած են Գերմանիայէն, Գանատայէն, Լիբանանէն, Ֆրանսայէն, Կիպրոսէն, Արժանթինէն, Ռուսիայէն եւ Էմիրութիւններէն:

«Օտարերկրեայ ներդրումների ներգրաւման ուղղութեամբ վերջին ժամանակներում ակտիւ քայլեր ենք իրականացնում: Ստեղծել ենք պետական աջակցութեան լուրջ գործիքակազմ, որը խթանում է բոլոր ոլորտները: Մենք ձեռնարկել ենք ներդրումային օրէնսդրութեան բարեփոխումներ: «Օտարերկրեայ ներդրումների մասին» նոր օրէնքը գրեթէ պատրաստ է, եւ շուտով կը ներկայացուի կառավարութեանը: Հիմնական շեշտը դրել ենք ներդրումների պաշտպանութեան վրայ, որը կը բերի ներդրողների վստահութեան բարձրացմանը: Մեծ քայլեր ենք իրականացրել Հայաստանը մեծ հարթակներում ներկայացնելու ուղղութեամբ: Դրանք բարձրացնում են ճանաչելիութիւնը՝ որպէս ներդրումների երկիր: Նախարարութեան կողմից ստեղծուեցին նաեւ Հայաստանի ներդրումային միջավայրը, ներդրումային ծրագրերը ներկայացնող տպագիր նիւթեր, որոնք մեր դիւանագիտական ներկայացուցչութիւնների միջոցով տարածուեցին ամբողջ աշխարհում, հրապարակուեցին կայքերում, նաեւ կրիչներով ուղարկուեցին տարբեր երկրներ», ըսած է Լալայեան, աւելցնելով, որ յաջորդ քայլը ներդրումային ծրագիրներու հարթակի ստեղծումն էր:

Ըստ Հայաստանի տնտեսական զարգացման եւ ներդրումներու նախարարութեան ներքին դիտարկման, 2017-ի առաջին 6 ամիսներուն կ՛իրականացուուին 66 ծրագիրներ՝ շուրջ 500 միլիոն տոլարի ընդհանուր ներդրումներով, որոնք կը ստեղծեն 7140 նոր աշխատատեղ:

Գիւղատնտեսութեան ոլորտէն ներս իրականացուած է շուրջ 45 միլիոն տոլարի ներդրում՝ ստեղծելով 640 աշխատատեղ: Մարզերու մէջ կատարուած է 167 միլիոն տոլարի ներդրում, եւ ստեղծուած է շուրջ 2000 աշխատատեղ՝ ամէնէն շատը՝ Վայոց Ձորի, Արարատի, Սիւնիքի, Կոտայքի մարզերուն մէջ:

LEAVE A REPLY

Please enter your comment!
Please enter your name here