Բանտ Նետելով Կարելի Չէ Լռեցնել Ցեղասպանութեան Մասին Գրած Լրագրողը. Սարըպալ

0
145

ԵՐԵՒԱՆ, «Թերթ».- Թուրքիոյ կառավարութեան գլխաւոր ընդդիմադիր՝ Հանրապետական ժողովրդային կուսակցութեան խորհրդարանական խմբակցութեան անդամ Օրհան Սարըպալ եւ իր շարք մը կուսակիցները այցելած են բանտարկուած լրագրող Ահմետ Շըքին, որ միայն քանի մը օր առաջ, դատարանին մէջ կատարած իր պաշտպանական ճառին ընթացքին դատապարտած էր իշխանութիւնները՝ զանոնք «ահաբեկիչ» անուանելով:

Նշենք, որ Շըք նաեւ այն թուրք այլախոհներէն է, որ կը ճանչնայ Հայոց Ցեղասպանութիւնը։

«Բանտ նետելով կարելի չէ լռեցնել զինք (Շըքը): Ճշմարտութեան մասին այսուհետեւ աւելի բարձր ձայնով պէտք է արտայայտուինք», ըսած է Սարըպալ:

Շըքի կինը, խօսելով ամուսնոյն աղմկայարոյց պաշտպանական ճառին ու շատերու կողմէ հերոսացուելուն մասին՝ ըսած է. «Ահմետը հերոս չէ՛: Ան պարզապէս ճշմարտութիւնը կը խօսի, բան մը, զոր շատերը չեն համարձակիր ընել»:

Յիշեցնենք, որ դատական նիստին ընթացքին Շըք ըսած էր. «Պետութեան պատմութիւնը արիւնո՛տ է: Հայերը, Հրանդը, Սուրիան… Քիչ ըսի՝ պետութիւնը մարդասպան չէ՛, այլ մոլի՛ մարդասպան է: Մեզ կը մեղադրէք ահաբեկիչներու հետ կապերու համար եւ երեք օր է դատարանին մէջ լրագրական գործունէութեանս մասին կը հարցնէք: Ի գիտութիւն՝ ձեր փնտռած ահաբեկչական խմբաւորումը քաղաքական կուսակցութեան անուան տակ կը ղեկավարէ այս երկիրը: Վե՛րջ»:

Դատարանէն հեռանալէ առաջ ան բացագանչած էր. «Կորչի՛ բռնապետութիւնը, կեցցէ՛ ազատութիւնը»:

LEAVE A REPLY

Please enter your comment!
Please enter your name here