Թրամփեան Երեք Սրբագրութիւններ՝ Երկու Օրուան Մէջ

0
131

ՈՒԱՇԻՆԿԹԸՆ, «Էյ.Պի.Սի.».- Ուրբաթ, 4 Օգոստոսին, «Ուաշինկթըն Փոսթ»ը բացայայտեց 27 Յունուարին, նախագահ Տոնալտ Թրամփի եւ Մեքսիքոյի անոր պաշտօնակից Էնրիքէ Փենիա Նիէթոյի միջեւ հեռաձայնային զրոյցին սղագրութիւնը, ուր Թրամփ կը խնդրէ Մեքսիքոյի նախագահէն, որ երկու երկիրներուն միջեւ պատ շինելու եւ անոր գումարը Մեքսիքոյէն գանձելու իր ծրագիրին դէմ չարտայայտուի՝ պատը իրեն համար «անկարեւոր», սակայն «քաղաքականօրէն շա՛տ կարեւոր» հարց մը համարելով։ Թրամփ անուղղակիօրէն ջանացած է հասկցնել, թէ ինք չ՛ակնկալեր, որ Մեքսիքօ վճարէ պատին համար, սակայն այդ հարցով Մեքսիքոյի լռութիւնը կ՛ուզէ։

Յատկանշական է, որ Թրամփ Մեքսիքոյի հետ պատ ունենալու հարցը իր ընտրապայքարին կարեւորագոյն հարցերէն մէկը դարձուցած էր՝ գաղթականներու ընդդիմացողներուն քուէները ապահովելով։

Մէկ օր առաջ, Սպիտակ տունը պարտադրուեցաւ հերքելու Թրամփի այն պնդումը, թէ Ամերիկայի սկաուտական շարժումը իրեն հեռաձայնելով՝ շնորհակալութիւն յայտնած էր սկաուտներուն առջեւ իր ունեցած ելոյթին համար, անիկա «կազմակերպութեան պատմութեան մէջ լաւագոյնը» համարելով։ Կազմակերպութիւնը, որ քննադատուած էր սկաուտներուն առջեւ քաղաքական յայտարարութիւններ կատարելու առիթը տուած ըլլալուն համար Թրամփին, վստահեցուցած է, թէ նման զրոյց տեղի չէ ունեցած…

Նաեւ, Մեքսիքոյի արտաքին գործոց նախարարութիւնը հերքեց Թրամփի կողմէ այս շաբաթասկիզբին կատարուած պնդումը, թէ դարձեա՛լ հեռաձայնային զրոյց մը ունեցած է Մեքսիքոյի նախագահին հետ, որ իբրեւ թէ դրուատած է սահմանին վրայ որդեգրուած խիստ պայմանները, որոնց իբրեւ հետեւանք՝ Մեքսիքոյէն Միացեալ Նահանգներ մուտք գործել փորձողներուն թիւը նուազած է։ Նախարարութիւնը շեշտեց, թէ ո՛չ միայն նման հաստատում չէ կատարուած նախագահ Նիէթոյի կողմէ, այլ նման հեռաձայնային զրոյց եւս տեղի չէ ունեցած…

Միւս կողմէ, Թրամփ Հինգշաբթի օր իր համակիրներուն առջեւ ելոյթի մը ընթացքին, Թրամփ յայտարարեց. «Այս ռուսական պատմութիւնը ամբողջութեամբ կեղծ է»՝ ակնարկելով 2016-ի նախագահական ընտրապայքարին մէջ ռուսերուն վերագրուող միջամտութեանց փորձերուն։ Յատկանշական է սակայն, որ Թրամփ միայն մէկ օր առաջ ստորագրած էր այդ միջամտութեանց իբրեւ հակադարձութիւն՝ Ռուսիոյ դէմ տնտեսական պատժամիջոցներու բանաձեւը։

Յայտնենք, որ 3 Օգոստոսին բացայայտուեցաւ, որ Թրամփի ընտրական խմբակին եւ ռուսերուն միջեւ կապերու հանգամանքները պարզելու նպատակով յատուկ դատախազ նշանակուած Ռոպըրթ Միւլըրը, «մեծ դատակազմ» կոչուող մարմին մը կազմած է՝ ընդարձակելու եւ խորացնելու համար հետաքննութիւնը։

LEAVE A REPLY

Please enter your comment!
Please enter your name here