ԹՈՒՐՔԻՈՅ ՀԱՅԵՐԸ ԱՒԵԼԻ ՇԱՏ ԿԸ ԽՕՍԻՆ ԻՐԵՆՑ ԻՆՔՆՈՒԹԵԱՆ ՄԱՍԻՆ

0
144

«Արեւմտահայոց Ազգային Համագումար»ի անդամ, «Վերադարձ» հիմնադրամի նախագահ Արագած Ախոյեան, Արեւմտահայաստան կատարած վերջին այցելութենէն ետք, «Արմենփրես»ի մամլոյ սրահին մէջ հրաւիրուած մամլոյ ասուլիսի ընթացքին դիտել տուաւ, թէ Թուրքիոյ մէջ հայերը աւելի շատ սկսած են խօսիլ իրենց ինքնութեան մասին:

« Անշուշտ, շատերը չեն խօսիր հայերէն, շատ քիչ բառեր գիտեն, սակայն ոգեւորիչ է այն փաստը, որ մարդիկ կը խօսին հայ ինքնութեան մասին». յայտնեց Ախոյեան: « Կան քաղաքներ, ուր հայերը բաւական կազմակերպուած են, կ’ոգեւորուին մեր այցելութիւններէն, կը լսեն հայերէն, կը կապուին Հայաստանին: Շարժում կայ, բնականաբար վտանգաւոր է, բայց մարդիկ պատրաստ են: Բան մը,որ քանի մը տարի առաջ անհնար էր».ըսաւ ան:
Ախոյեան նկատել տուաւ, թէ կարգ մը քաղաքներու մէջ հայերը կը գործեն բաւական կազմակերպուած: Իբրեւ օրինակ ներկայացուց Խարբերդի մէջ բողոքական եկեղեցւոյ տարածքը ինքնաշարժներու վայրի վերածելու իշխանութեան ծրագիրը, որ հայերու դիմադրութեան հանդիպելով կասեցուած է:
Ախոյեան նաեւ յիշատակեց տեղւոյն հայկական գերեզմանատունը վերաբանալու Մուշի հայ համայնքին աշխատանքը: Այդ ութ հազար քառակուսի մեթր տարածքին վրայ կը գտնուի Գէորգ Չաւուշի դամբարանը: Գերեզմանատունը ներկայիս փակ է:

LEAVE A REPLY

Please enter your comment!
Please enter your name here