Խնդրայարոյց Հարցերու Մեղմացման Ճիգերու Լոյսին Տակ. Քաղաքական, Ապահովական Եւ Տնտեսական Հարցերու Լուծման Քայլերը` Քննարկման Առանցքային Նիւթ

0
159

Քաղաքական եւ ընկերային-տնտեսական խնդրայարոյց տագնապներու լուծման ճիգերը շարունակուեցան շաբաթավերջին` մէկէ աւելի մակարդակներու վրայ:

Վերջին տարիներուն երկիրը ապահովական մղձաւանջային սպառնալիքներու մատնած ահաբեկչական խմբաւորումներու Լիբանանէն հեռացման գործնական նախապատրաստութիւնները շարունակուեցան շաբաթավերջին, իսկ այս գծով զօրակցութեան ու գործակցութեան պատրաստակամութեան կեցուածքները վերահաստատուեցան:

Նասրալլայի Խօսքը

Հըզպալլայի ընդհանուր քարտուղար սէյիտ Հասան Նասրալլա երէկ` կիրակի, 13 օգոստոսի երեկոյեան վերահաստատեց այս առումով լիբանանեան բանակին հետ Հըզպալայի գործակցութեան պատրաստակամութիւնը` սպասելով բանակի հրամանատարութեան արձակելիք ազդանշանին` ՏԱՀԵՇ-ի դէմ մղուելիք ճակատամարտի սկզբնաւորութեան առնչութեամբ: «Յուլիսեան յաղթանակ»-ի 11-րդ տարեդարձին գծով Խիամի մէջ տեղի ունեցած ձեռնարկին ընթացքին արտասանած իր պատկերասփռուած խօսքին մէջ Նասրալլա տողատակի պատգամներ յղեց առնչակից կողմերուն` վերահաստատելով Հըզպալլայի պատրաստակամութիւնը Լիբանանը պաշտպանելու ներքին թէ արտաքին ճակատներու վրայ: Ան յատկապէս սպառնաց Իսրայէլը աւելի ծանր պարտութեան մատնել` դարձեալ Լիբանան ներխուժելու կամ յարձակումի պարագային: «Իսրայէլեան սպառնալիքներու օրերը անցան այլեւս, եւ յաղթանակը ապահով է որեւէ վտանգի դէմ», ընդգծեց Նասրալլա: Ներքին ճակատի վրայ եւս Նասրալլա առնչակից կողմերուն թելադրեց վերատեսութեան ենթարկել Սուրիոյ հետ յարաբերութեան առումով իրենց քաղաքական հաշուարկները` անհրաժեշտ նկատելով Սուրիոյ հետ գործակցութիւնը, ուր Լիբանան առաւել շահաւոր դուրս կու գայ: «Մեր միակ դրացին Սուրիան է», շեշտեց սէյիտ Նասրալլա: Ան յիշեցուց, որ 2000 թուականի իրագործումը սոսկ երազներով ու մաղթանքներով չիրականացաւ, այլ` Դիմադրութիւնը գիշեր-ցերեկ արթուն հսկեց, պատրաստ` դիմակալելու որեւէ իրադարձութիւն կամ վտանգ: «Հըզպալլա մէկ մասնիկն է այն ուժին, որ ձախողեցուց մեծն Իսրայէլի երազն ու Նոր Միջին Արեւելքի ծրագիրը», հաստատեց սէյիտ Նասրալլա: Ան նաեւ շեշտեց, թէ բանակը յաղթական դուրս պիտի գայ, Արսալի բարձունքներէն պիտի վանէ ահաբեկիչները եւ ազատագրէ այդ բարձունքներուն մնացեալ հողատարածքը` վերահաստատելով այս գծով Հըզպալլայի գործակցութեան պատրաստակամութիւնը լիբանանեան բանակին հետ եւ նշելով, որ ՏԱՀԵՇ-ի դէմ ճակատամարտի սկզբնաւորութեան ժամը բանակը ի՛նք պիտի որոշէ:

Վարչապետ Սաատ Հարիրի Քուէյթի Մէջ

Մինչ այդ վարչապետ Սաատ Հարիրի շաբաթ ուշ գիշերին հասաւ Քուէյթ եւ երէկ զանազան հանդիպումներ ունեցաւ Քուէյթի բարձրաստիճան պատասխանատուներուն հետ: Քուէյթի իշխան շէյխ Սուպահ Ահմետ Ժապեր Սուպահի հետ հանդիպումի աւարտին վարչապետ Հարիրի յայտնեց, որ Քուէյթի իշխանին եւ վարչապետին հետ քննարկած է երկկողմանի յարաբերութիւնները` վերահաստատելով այս գծով կողմերուն միջեւ գործակցութեան եւ համերաշխութեան պատրաստակամութիւնը: «Քուէյթի ապահովութիւնը Լիբանանի ապահովութենէն է», շեշտեց Հարիրի` նշելով, որ որոշ ընդվզում նկատած է քուէյթցի վարիչներուն մօտ «Ապտալիի բջիջ»-ին հարցով: Սակայն ան հանգստացուց, թէ յաջողած է փարատել այս մասին տիրող թիւրիմացութիւնը եւ թէ «Լիբանանի դէմ քայլեր պիտի չառնուին Քուէյթի կողմէ»: Հարիրի յայտնեց, որ ինք անձամբ պիտի հետապնդէ այս հարցը` միշտ կապի մէջ մնալով Հըզպալլայի պատկան մարմիններուն հետ: Հարիրի յոյս յայտնեց, որ այս իմաստով կացութիւնը կ՛ընթանայ դէպի բարելաւում:

Նշենք, որ Քուէյթի ապահովական մարմինները շաբաթավերջին յայտարարեցին նշեալ հարցով նոր կասկածելիի մը ձերբակալութիւնը, «որուն խոստովանութիւնը ունինք մեր տրամադրութեան տակ»: Քուէյթի իշխանութիւնները «Ապտալիի բջիջ»-ի հարցով Հըզպալլան կը մեղադրեն Քուէյթի մէջ ահաբեկչական գործողութիւններ ծրագրելու հարցով: Իսկ Հըզպալլայի ընդհանուր քարտուղար սէյիտ Հասան Նասրալլա շաբաթավերջին հերքած էր Հըզպալլայի առնչութիւնը նշեալ բջիջին հետ:

Լաքլուքի Հանդիպումը

Դարձեալ քաղաքական գետնի վրայ, շաբաթավերջին Ազգային ազատ հոսանք եւ Լիբանանեան ուժեր կուսակցութիւններու ղեկավարներու մասնակի հանդիպում մը տեղի ունեցաւ արտաքին գործոց նախարար Ժըպրան Պասիլի Լաքլուքի բնակարանին մէջ` մասնակցութեամբ տեղեկատուութեան նախարար Մլհեմ Ռիաշիի եւ երեսփոխան Իպրահիմ Քանաանի: Խորհրդակցութեանց առանցքը կազմեց միջքրիստոնէական համերաշխութեան եւ գործակցութեան անհրաժեշտութիւնը երկիրը յուզող տագնապներուն դիմաց: Այս մասին նախարար Ռիաշի եւ երեսփոխան Քանաան «Թուիթըր»-ի իրենց էջերուն վրայ անջատ, բայց նմանօրինակ գրառումներով վերահաստատեցին երկու կողմերուն միջեւ տիրող սերտ յարաբերութիւնը:

Սարայա Ահլ Շամի Մեկնումը Յետաձգուեցաւ

Ապահովական-զինուորական գետնի վրայ եւս նախապատրաստական ճիգերը շաբաթավերջին շարունակուեցան երկիրը, յատկապէս Արսալը ազատագրելու ահաբեկիչներու վտանգէն: Այսուհանդերձ, «մասնակի, չնչին» խոչընդոտներ արգելակեցին Սարայա Ահլ Շամի զինեալներու Արսալի բարձունքներէն մեկնումը ճշդուած ժամկէտին: Այս մասին Ընդհանուր ապահովութեան ուժերու ընդհանուր տնօրէն հազարապետ-զօրավար Ապպաս Իպրահիմ յայտնեց, որ նախապատրաստական քայլերը ամբողջացած են ըստ նախօրօք գոյացած համաձայնութեան եւ զինեալներուն ու անոնց ընտանիքներուն մեկնումը պիտի կայանայ կիրակի առաւօտեան ժամը 4:00-ին: Աւելի ուշ «Էլ.Պի.Սի.» պատկերասփիւռի կայանը հաղորդեց, որ 395 զինեալներու եւ անոնց ընկերացող շուրջ եօթը հարիւր քաղաքայիններու նշեալ մեկնումը դէպի Քալամունի շրջան յետաձգուած է այսօր` երկուշաբթի կանուխ առաւօտեան ժամը 5:00-ին: Մեկնումի առկախման պատճառին շուրջ թիւրիմացութիւն մը ծագած էր առնչակից կողմերուն միջեւ: Արդարեւ, այն միջոցին, երբ իմացուեցաւ, թէ մեկնումը առկախուած է` ստիպելով, որ զինեալները ապազինուին եւ միայն իրենց անհատական զէնքերով մեկնին, Սարայա Ահլ Շամի պատասխանատուներէն շէյխ Օմար յետաձգման պատճառը վերագրեց Սուրիոյ Քալամունի շրջանի արեւելեան թէ արեւմտեան շրջաններուն միջեւ տեղակայումի շուրջ ծագած բանավէճին: Ըստ կարգ մը աղբիւրներու, զինեալներուն մէկ մասը պիտի տեղակայուի Քալամունի արեւելեան շրջանը, իսկ այլ խումբ մը` արեւմտեան մասը, սպասելով իրենց կարգավիճակի դասաւորման` սուրիական իշխանութեան պատկան մարմիններուն հետ: Այս ծիրին մէջ իմացուեցաւ, թէ սուրիական իշխանութիւնները ազատ արձակած են հարիւր բանտարկեալներ` այս առնչութեամբ գոյացած համաձայնութեան հիմամբ:

Ընկերային-Տնտեսական Հարցերը` Նոյնքան Առանցքային

Քաղաքական եւ ապահովական նշեալ քայլերու կողքին նոյնքան առանցքային ուշադրութիւն գրաւեցին երկրի ընկերային-տնտեսական հարցերու լուծման գծով առաջադրուող քայլերը, որոնց ծիրին մէջ է նաեւ այսօր նախատեսուող Պաապտայի ընկերային կառոյցներու հանդիպումը: Նախագահ զօր. Միշել Աունի նախաձեռնութեամբ եւ վարչապետ Սաատ Հարիրիի մասնակցութեամբ ընկերային-տնտեսական մարզերու եւ կառոյցներու երեսուն ներկայացուցիչներու հանդիպումը այսօր կէսօրէ առաջ ժամը 11:00-ին մեծ յոյսեր կը խոստանայ ընկերային-տնտեսական պահանջներու եւ յատկապէս աշխատավարձերու յաւելման երկարատեւ տաղտուկի լուծման իմաստով:

Այս գծով ելեւմուտքի նախարար Ալի Հասան Խալիլ երէկ թախանձագին կոչ ուղղեց նախագահ Միշել Աունին` ստորագրելու աշխատավարձերու յաւելման օրէնքը` խոստանալով այնուհետեւ քննել բարեփոխման որեւէ առաջարկ: Նախարար Խալիլի այս քայլը կու գայ խորհրդարանի նախագահ Նեպիհ Պըրրիի զգուշացումէն ետք` այն հետեւանքներուն գծով, որոնք կրնան ի յայտ գալ, եթէ նշեալ օրինագիծը չստորագրուի եւ խորհրդարան վերադարձուի առ ի բարեփոխում:

Նոյն ծիրին մէջ, տնտեսական եւ կրթական մարզերը այսօր` երկուշաբթի, 14 օգոստոսին ընդհանուր եւ համատարած գործադուլի օր հռչակեցին` սպառնալով սաստկացնել իրենց քայլերը, եթէ նշեալ օրինագիծը չվաւերացուի նախքան ընթացիկ 17 օգոստոսը:

Միւս կողմէ, Դրամատուներու ընկերակցութեան նախագահ Ժոզեֆ Թարապէյ ահազանգ հնչեցուց, որ լիբանանեան տնտեսութիւնը անզօր է դիմանալու աշխատավարձերու յաւելման զուգահեռ տնօրինուելիք տուրքերու ճնշումին:

Այս բոլորի լոյսին տակ երկրի կրթական ու վարչամեքենայի մարզերը իրենց գրասենեակները փակելով փողոց պիտի իջնեն Դրամատուներու թաղին մէջ` զօրաշարժի մատնելով իրենց անդամները եւ սպասելով Պաապտայի հանդիպումի արդիւնքին, յատկապէս նախագահ Միշել Աունի կեցուածքին:

LEAVE A REPLY

Please enter your comment!
Please enter your name here