Ատրպէյճանի Իշխանութիւնները Երկիրը Նոր Հիւսիսային Քորէայի Կ՛ուզեն Վերածել. Եունուս

0
160

ԵՐԵՒԱՆ, «Ազատութիւն».- Ատրպէյճանցի յայտնի իրաւապաշտպան Լէյլա Եունուս, որ քանի մը տարի Պաքուի մէջ բանտարկուելէ ետք՝ ներկայիս Հոլանտա ապաստանած է, անդրադառնալով «Թուրան» լրատուական գործակալութեան դէմ Պաքուի իշխանութեանց սկսած հետապնդումներուն՝ Օգոստոս 17ին յայտարարեց, թէ Ատրպէյճանի իշխանութիւնները երկիրը կ՛ուզեն Հիւսիսային Քորէայի նման բռնատիրութեան մը վերածել՝ լռութեան մատնելով երկրին վերջին անկախ լրատուամիջոցը:

Ըստ Եունուսի՝ Ալիեւի վարչակազմը կը պնդէ, թէ այդ լրատուական գործակալութիւնը խուսափած է տուրքերէ։ Սակայն, ան կտրուկ կերպով կը հերքէ այդ անհիմն մեղադրանքը՝ պնդելով, որ Պաքուն, իրականութեան մէջ, այդ գործակալութիւնը լռեցնելու նպատակ կը հետապնդէ:

«Ասիկա արշաւ է արտայայտուելու ազատութեան դէմ», յայտարարած է Եունուս՝ մանրամասնելով. «Ատրպէյճանի մէջ ընդդիմադիր թերթեր չեն մնացած։ Վերջինը՝ «Ազատլըք»ը, որ կը հրատարակուէր խորհրդային տարիներէն, ստիպուեցաւ դադրեցնելու իր գործունէութիւնը անցեալ տարի»։

Յիշեցնենք, որ 2014ին, Եունուս եւ իր ամուսինը ձերբակալուած էին Հայաստանի ի նպաստ լրտեսութիւն կատարելու յանցանքով:

LEAVE A REPLY

Please enter your comment!
Please enter your name here