Թուրքիա Կ՛ամրապնդէ Իրանի Հետ Իր Զինուորական Յարաբերութիւնները

0
148

ԱՆԳԱՐԱ, «Ռոյթըրզ».- Անգարա այցելած Իրանի սպայակոյտի պետ Մոհամետ Պաքերի 17 Օգոստոսին յայտնեց, որ Անգարա եւ Թեհրան համաձայնած են ահաբեկչութեան դէմ պայքարին մէջ տեղեկութիւններու փոխանակում կատարելու եւ միացեալ գործողութիւններ կատարելու գծով:

Պաքերի, որ իր թուրք պաշտօնակիցին՝ Հուլուսի Աքարի, եւ այլ բարձրաստիճան պաշտօնատարներու, ներառեալ՝ նախագահ Էրտողանի հետ հանդիպումներ ունենալու համար հազուադէպ այցելութիւն մը տուած էր Թուրքիա, յայտնեց, որ երկու երկիրներու զինուորական գործակցութեան եւ սահմանային ապահովութեան շուրջ համաձայնութիւններ գոյացած են: «Այս հոլովոյթը պիտի շարունակուի», ըսաւ ան, ընդգծելով, որ Աքարը հրաւիրած է Իրան՝ շարունակելու համար երկու երկիրներու գործակցութիւնը. ան աւելցուց, որ Էրտողան եւս մօտ օրէն Իրան պիտի այցելէ։

Պաքերի ըսաւ, որ Իրաքի Քրտական ինքնավար մարզի անկախութեան հանրաքուէն թուրք եւ իրանցի պաշտօնատարներու օրակարգին վրայ հրատապ հարց մըն է: «Եթէ այդպիսի բան պատահի, ապա անիկա նոր լարուածութիւններու սկիզբը պիտի ըլլայ եւ դրացի երկիրներուն վրայ ժխտական ազդեցութիւն պիտի ունենայ: Ահա՛ թէ ինչու երկու երկիրները կը պնդեն, թէ հանրաքուէն պէտք չէ՛ տեղի ունենայ», աւելցուց ան:

Իր կարգին, Թուրքիոյ նախագահի բանբեր Իպրահիմ Քալըն հաստատեց, որ իր երկիրը ամրապնդած է Իրանի հետ զինուորական համագործակցութիւնը՝ Իրաքի քրտական մարզին կոչ ուղղելով ետդարձ կատարելու անկախութեան շուրջ հանրաքուէ կատարելու որոշումէն։ «Թուրքիա-Իրաք սահմանին վրայ գոյութիւն ունին կարգ մը խնդիրներ, սակայն կը փորձենք լուծումներ առաջարկել: Քերքուքը հիւսիսային Իրաքի Քրտական մարզի հանրաքուէին մէջ ներառելը սխա՛լ է եւ ապօրինի, որովհետեւ անիկա թիւրքմէնական քաղաք է եւ անոր բնակիչները հանրաքուէն պոյքոթի պիտի ենթարկեն», նշեց Քալըն:

«Չենք կրնար Սուրիոյ մէջ նախատեսուած զինուորական գործողութեան մասին մանրամասնութիւններ հաղորդել, սակայն պէտք է գիտնաք, որ քայլեր պիտի որդեգրենք, երբ մեր երկրին ապահովութիւնը վտանգուի», աւելցուց ան:

LEAVE A REPLY

Please enter your comment!
Please enter your name here