Օղիի Ներածումը Կը Նուազի, Իսկ Գինիի Արտադրութիւնը Կ՛աւելնայ

0
182

ԵՐԵՒԱՆ.- Հայաստանցիք սկսած են աւելի քիչ օղի ներածելու, նաեւ աւելի քիչ արտադրելու: Արդարեւ, օղիի ներածման ծաւալները նուազած են 4 տոկոսով, իսկ օղիի տեղական արտադրութեան ծաւալները նուազած են 30 տոկոսով: Այս մասին զեկուցած է գինիի ազգային կեդրոնի նախագահ Աւագ Յարութիւնեան՝ ներկայացնելով գինիի, օղիի, քոնեաքի արտադրութեան, արտածման ցուցանիշները:

Օղիի ծաւալներու նուազումը Յարութիւնեան կը կապէ ոչ թէ քաղաքացիներու ոգելից այս խմիչքէն հրաժարելուն, այլ՝ արտագաղթի, բնակչութեան թուաքանակի նուազման հետ:

«Նուազում է աշխատող ձեռքը, նուազում են խմող մարդիկ», յայտնած է Աւագ Յարութիւնեան:

Գինիի արտադրութիւնը, ըստ Յարութիւնեանի, աճած է 30 տոկոսով, քոնեաքինը, համաձայն պաշտօնական տուեալներու՝ 61 տոկոսով:

Ռուսիոյ նկատմամբ պատժամիջոցները, ըստ Յարութիւնեանի, ստիպած են այդ երկրին, որ արագացնէ ռուսական գինիի եւ քոնեաքի արտադրութիւնը:

Հայաստանէն դէպի Եւրոպա գինիի արտածման ծաւալներն աւելցած են 1 տոկոսով, 1-2 տոկոս ալ աւելցած է արտածումը դէպի Միացեալ Նահանգներ:

Սեպտեմբերին կը մեկնարկէ «Հայաստանի տնկարկների կադաստրի (կալուածատոմար-Խմբ.)» ստեղծման ծրագիրը: Ըստ Խաղողագործութեան եւ գինեգործութեան հիմնադրամի գործադիր տնօրէն Զարուհի Մուրադեանի՝ այս ծրագիրին շնորհիւ հնարաւորութիւն կը ստեղծուի գոյքագրելու հանրապետութեան խաղողի բոլոր տնկարկներն ու գոյութիւն ունեցող տեսականին, վերահսկելի դարձնելու գինեգործական արտադրանքի որակը:

Նշենք, ոը հայ գինեգործները հայկական գինիի որակով գրաւեցին եւրոպական յայտնի «Mundus Vini 20th Grand International Wine Awards» միջազգային մրցոյթի հարթակը, որուն մասնակցեցան հայկական 19 գինեգործական ընկերութիւններ, որոնք վերադարձան 23 մետալով՝ 10 ոսկի եւ 13 արծաթ:

Հայաստանի խաղողագործութեան եւ գինեգործութեան հիմնադրամի գործադիր տնօրէն Զարուհի Մուրադեան կը վստահեցնէ, որ յաղթարշաւը պիտի շարունակուի:

Նշենք նաեւ, որ հայկական գինեգործական 15 ընկերութիւններ միասնական տաղաւարով հայկական արտադրանքը շուտով պիտի ներկայացնեն Չինաստանի եւ Գերմանիայի մէջ:

LEAVE A REPLY

Please enter your comment!
Please enter your name here