Հայաստանի Եւ Արցախի Վարչապետները Կը Ծանօթանան Թալիշի Վերականգնման Աշխատանքներուն

0
118

Արցախի Հանրապետութեան վարչապետ Արայիկ Յարութիւնեան, իր արձակուրդը Արցախի մէջ անցընող վարչապետ Կարէն Կարապետեանի հետ 16 Օգոստոսին այցելեց Ասկերանի, Մարտունիի եւ Մարտակերտի շրջանները, յատկապէս Մատաղիս եւ Թալիշ գիւղերը:

Հայկական երկու հանրապետութիւններու գործադիր իշխանութիւններու ղեկավարները ծանօթացան Ասկերանի եւ Մարտունիի շրջաններուն մէջ ոռոգման կաթիլային համակարգերու միջոցով նռան այգիներու եւ ծխախոտի դաշտերու մշակութեան: Այցին ընթացքին ոռոգման կաթիլային համակարգի առաւելութիւններուն եւ առանձնայատկութիւններուն մասին համապարփակ զեկուցումով երկու վարչապետներուն համար հանդէս եկաւ Արցախի գիւղատնտեսութեան փոխնախարար Գէորգ Վերանեան:

Այնուհետեւ վարչապետները ուղեւորուեցան Մարտակերտի շրջանի Մատաղիս եւ Թալիշ գիւղերը: Արցախի անվտանգութեան խորհուրդի քարտուղար Վիտալի Բալասանեանի եւ Մարտակերտի շրջանի վարչակազմի ղեկավար Վլադիկ Խաչատրեանի ուղեկցութեամբ՝ երկու վարչապետները ծանօթացան Թալիշի մէջ ընթացող շինարարական աշխատանքներուն, ինչպէս նաեւ տեղւոյն վրայ քննարկեցին գիւղի զարգացման վերաբերող շարք մը ծրագիրներ:

«Թալիշի վերականգնման ծրագիրը գտնւում է մեր ամէնօրեայ ուշադրութեան կենտրոնում: Անցած տարուայ Ապրիլին, Ադրբեջանի սանձազերծած ռազմագործողութիւնների հետեւանքով, գիւղի բնակչութիւնը ստիպուած է եղել լքել սեփական տունն ու տեղը: Այսօր մեր խնդիրն է անվտանգութեան բաւարար եւ սոցիալ-տնտեսական գրաւիչ պայմաններ ապահովել, որպէսզի ապագայում թալիշցիներն այլեւս հարազատ օջախը լքելու խնդիր չունենան», յայտնեց վարչապետ Յարութիւնեան:

Ա. Յարութիւնեան եւ Կ. Կարապետեան Մատաղիսի մէջ այցելեցին նորաբաց հանգստեան գօտին, ուր ծանօթացան Մատաղիսի ջրամբարի հարեւանութեամբ օտարերկրեայ ներդրումով ստեղծուած հանգիստի ու ժամանցի պայմաններուն:

LEAVE A REPLY

Please enter your comment!
Please enter your name here