Լիբանանեան Բանակը Սկսաւ «Բարձունքներու Արշալոյսը» Գործողութեան Եւ ՏԱՀԵՇ-էն Ազատագրեց Ռաս Պաալպեքի Եւ Քաայի Բարձունքներուն Երկու Երրորդը

0
159

Լիբանանեան բանակին կողմէ Ռաս Պաալպեքի եւ Քաայի բարձունքները ազատագրելու երկար սպասուած ճակատամարտին ժամկէտը պաշտօնապէս յայտարարուեցաւ շաբաթ առաւօտեան ժամը 5:00-ին` բանակի հրամանատար զօր. Ժոզեֆ Աունի կողմէ:

Լիբանանի, առեւանգուած բանակայիններուն եւ բանակին նահատակներուն ու հերոսներուն անունով զօր. Աուն յայտարարեց «Բարձունքներու արշալոյսը» գործողութիւնը` Ռաս Պաալպեքի եւ Քաայի բարձունքները ՏԱՀԵՇ-էն ազատագրելու նպատակով:
Ճակատամարտի սկիզբէն շուրջ ժամ մը ետք հանրապետութեան նախագահ զօր. Միշել Աուն ուղղուեցաւ պաշտպանութեան նախարարութիւն, ուր բանակի հրամանատարին հետ հետեւեցաւ գործողութեան մանրամասնութիւններուն:
Նախագահ Աուն հեռաձայնային հաղորդակցութիւն մը ունեցաւ ճակատամարտի պատասխանատու հրամանատարներուն հետ` յաջողութիւն մաղթելով անոնց եւ բոլոր բանակայիններուն:
«Բոլոր լիբանանցիները կը զօրակցին ձեզի: Բոլորիս սրտերն ու մտքերը ձեզի հետ են:

Կ՛ողջունեմ ձեզ եւ կը հաստատեմ, որ ամբողջ Լիբանանը կը սպասէ ձեր յաղթանակին: Կ՛ողջունեմ իւրաքանչիւր զինուոր եւ վստահ եմ, որ լիբանանցիները պիտի չյուսալքուին: Ցարդ ամէն բան կարգին կ՛ընթանայ, եւ մեր ճակատամարտը յաղթանակով պիտի աւարտի, ի՛նչ ալ ըլլան պայմանները», շեշտեց նախագահ Աուն:
Առաւօտեան ժամը 9:00-ին պաշտպանութեան նախարարութեան մէջ գնդապետ-զօրավար Ալի Քանսօ մամլոյ ասուլիսի մը ընթացքին շեշտեց, որ իրենց նպատակն է ՏԱՀԵՇ-ի կեդրոնները քանդել եւ բռնագրաւուած լիբանանեան հողերը ազատագրել` հասնելով մինչեւ Սուրիոյ հետ սահմանամերձ շրջան:
Ան նշեց, որ սուրիական բանակին եւ Հըզպալլայի հետ զինուորական գործողութիւններու համադրում չկայ:
Քանսօ շեշտեց, որ ահաբեկչութեան դէմ բանակին մղած ամէնէն դժուար պատերազմն է ասիկա` նկատի ունենալով բռնագրաւուած բարձունքներուն աշխարհագրական դիրքը, ինչպէս նաեւ ահաբեկիչներուն անձնասպանական գործողութեան հեղինակներ ըլլալու իրականութիւնը:
Քանսօ հաստատեց նաեւ, որ բանակը լաւատեղեակ է ՏԱՀԵՇ-ի տկար կէտերուն մասին եւ ըստ այնմ պիտի կռուի անոր դէմ:

«Սակայն լիբանանեան բանակին կորովը բարձր է, զէնքն ու զինամթերքը պատրաստ են, եւ ՏԱՀԵՇ-ի դէմ կռուելու բոլոր միջոցները ունինք: Մենք այս ճակատամարտէն յաղթական դուրս պիտի գանք: Այս պատերազմէն հարիւր առ հարիւր յաղթական դուրս պիտի գա՛նք, որքա՛ն ալ երկարատեւ ըլլայ եւ ինչքան ալ զոհողութիւն պահանջէ մեզմէ: Մեր նպատակը ՏԱՀԵՇ-ի ոչնչացումն է», շեշտեց ան:
Լիբանանեան քաղաքական, ապահովական եւ ժողովրդային զօրակցութիւնը վայելող բանակը ամբողջ շաբաթավերջին ընթացքին իր օդուժով, թնդանօթներով եւ բազմափող հրթիռային համակարգով բուռն կերպով շարունակեց ռմբակոծել Ռաս Պաալպեքի եւ Քաայի բարձունքներուն վրայ գտնուող ՏԱՀԵՇ-ի դիրքերը` արձանագրելով ուղղակի հարուածներ, որոնց պատճառով քանդուեցան ՏԱՀԵՇ-ի կարգ մը դիրքեր եւ անոր շարքերուն մէջ արձանագրուեցան զոհեր ու վիրաւորներ:
Առաջին օրուան ընթացքին բանակի շարքերէն արձանագրուեցաւ 10 վիրաւոր, որոնցմէ մէկուն վիճակը ծանր էր, իսկ ՏԱՀԵՇ-ի շարքերէն արձանագրուեցան 20 զոհեր եւ մեծ թիւով վիրաւորներ:
Բանակը կրցաւ ազատագրել բռնագրաւուած Ռաս Պաալպեքի բարձունքներէն 30 քառ. քմ եւ տիրեց այդ տարածքին մէջ գտնուող ՏԱՀԵՇ-ի դիրքերուն:
Շաբաթ կէսօրէ ետք պաշտպանութեան նախարարութեան մէջ տեղի ունեցած մամլոյ ասուլիսին ընթացքին, բանակի հրամանատարութիւնը պաշտօնապէս յայտնեց, թէ բանակը կրցած է ազատագրել Թալաաթ Ատան բլուրը եւ 1564 ու Մխայրմէ բարձունքները:
Ըստ բանակին, ազատագրուած այս զոյգ բարձունքները ռազմավարական նշանակութիւն ունին եւ նպաստած են, որ բանակը կարենայ բռնագրաւուած Ռաս Պաալպեքի 30 քառ. քմ-ը ազատագրել:
Գնդապետ-զօրավար Նազիհ Ժրէյժ շեշտեց, որ բանակը կրցած է ՏԱՀԵՇ-ի պատկանող 11 կեդրոն քանդել, ինչպէս նաեւ իր հակակշիռին տակ առնել ահաբեկիչներուն գետնափոր անցքերն ու թումբերը, ինչպէս նաեւ գրաւել մեծ թիւով զէնքեր, զինամթերք եւ պայթուցիկ նիւթեր:
Ժրէյժ շեշտեց, որ ՏԱՀԵՇ-ի դէմ կռիւը պիտի շարունակուի եւ կարելի է ըսել, որ յաղթանակը մօտալուտ է: «Նախորդ ամիսներուն ընթացքին ՏԱՀԵՇ-ի դիրքերուն դէմ բանակին ռմբակոծումներուն շնորհիւ այդ ահաբեկիչները տկարացած ու շրջափակուած էին նեղ օղակի մէջ: Հետեւաբար անոնք կռիւը շարունակելու ի վիճակի չեն, եւ մօտիկ ապագային յաղթանակի յայտարարութիւնը կը սպասուի», ըսաւ ան:
Նշենք, որ շաբաթ յետմիջօրէին Ընդհանուր ապահովութեան ընդհանուր ուժերու շքախումբ մը` ընկերակցութեամբ Լիբանանեան Կարմիր խաչի հիւանդատարներուն եւ լիբանանեան բանակին ուղղուեցաւ ազատագրուած Արսալի Ուատի Հմայտ շրջանը:
Ընդհանուր ապահովութեան ընդհանուր ուժերու ընդհանուր տնօրէն հազարապետ-զօրավար Ապպաս Իպրահիմ, որ շքախումբին մաս կը կազմէր, յայտնեց հետեւեալը. «Մենք ազգային սուրբ պարտականութիւն մը կը կատարենք
եւ բոլոր լրատուամիջոցներէն կը խնդրենք մեկնաբանութիւններ եւ վերլուծումներ չկատարել, որպէսզի մեր առաքելութիւնը յաջողութեամբ պսակուի, ինչպէս նաեւ ժողովուրդը զգացական յաւելեալ ճնշումներու չենթարկուի: Մենք մեր ստանձնած պարտականութեան արդիւնքները պիտի յայտարարենք զայն աւարտելէ անմիջապէս ետք»:
Անպաշտօն աղբիւրներու համաձայն, Ապպաս Իպրահիմ լուրեր ստացած էր, թէ Արսալի բարձունքներուն վրայ հաւաքական գերեզման մը կայ, եւ Ընդհանուր ապահովութեան ուժերը ուղղուած էին որոնելու այդ գերեզմանն ու «Տի. Էն. Էյ.»-ի քննութեան ենթարկելու գտնուելիք դիակները: Սակայն երէկ գիշեր Ապպաս Իպրահիմ ընդգծեց, որ Ընդհանուր ապահովութեան ուժերը ոչ մէկ դիակ գտած են Արսալի բարձունքներուն վրայ նշուած վայրին մէջ:
Ապպաս նշեց, որ առեւանգուած բանակայիններու թղթածրարին իմաստով ինք տակաւին պարտականութեան վրայ կը մնայ եւ վերահաստատեց այդ թղթածրարին սրբութիւնը` դարձեալ կոչ ուղղելով բոլոր լրատուամիջոցներուն այդ հարցը հեռու պահելու առօրեայ քննարկումներէ եւ մեկնաբանութիւններէ:
ՏԱՀԵՇ-ի դէմ պատերազմը շարունակուեցաւ շաբաթէն կիրակի լուսցող գիշերուան ընթացքին:
Բանակը շարունակեց բուռն կերպով ռմբակոծել Ուատի Միրա եւ Ուատի Մարթպայա շրջանները` ազատագրելով Ռաս Պաալպեքի, Քաայի եւ Ֆեքհայի բարձունքներուն մէկ մասը:
Զինուորական այս նուաճումներուն շնորհիւ բանակը կրցաւ Արսալի բարձունքները միացնել Ռաս Պաալպեքի բարձունքներուն` զանոնք մաքրագործելով ՏԱՀԵՇ-էն:
Պաշտպանութեան նախարարութեան կիրակի օրուան տուեալներուն համաձայն,
բանակը ՏԱՀԵՇ-ի դէմ սանձազերծուած պատերազմին ընթացքին կրցած է 120 քառ. քմ-էն 80-ը ազատագրել:
Գնդապետ-զօրավար Ֆատի Ապու Իտ շեշտեց, որ յաւելեալ տարածքներ ազատագրելու կողքին, բանակը կրցած է քանդել նաեւ ՏԱՀԵՇ-ին պատկանող զրահապատներ եւ թումբեր:
Ապու Իտ շեշտեց, որ ճակատամարտի երկրորդ օրուան նպատակներն էին հակակշիռի տակ առնել Ժապալ Խշընը, Խըրպեթ Թինը, Քըրնէն, Տալիլ Ում Ժումաան, Հուքապ Համամը, Քանիաթ Ասալը, Տալիլ Հսայնը եւ Խըրպեթ Տաուտը:
Ապու Իտ նշեց, որ բանակը կրցած է քանդել ՏԱՀԵՇ-ին պատկանող 12 դիրքեր, ուրկէ գրաւած է մեծ թիւով զէնք ու զինամթերք: «ՏԱՀԵՇ քայքայուած վիճակ մը ունի, եւ անոր անդամները փախուստ կու տան», շեշտեց ան:
Ապու Իտ ըսաւ նաեւ, որ բանակը պայթեցուցած է ականուած ինքնաշարժ մը եւ մոթորսիքլեթ մը, որոնք կը մօտենային դէպի իր դիրքերը` անձնասպանական գործողութիւններու հեղինակներու կողմէ առաջնորդուելով:
Ան յայտնեց, որ բանակի սակրաւորները ազատագրուած շրջաններուն մէջ ականները կը վնասազերծեն` աւելցնելով, որ ականները մեծաթիւ են եւ կը դանդաղեցնեն բանակին յառաջացումը:
Միւս կողմէ, բանակի հրամանատարութիւնը հրապարակեց հաղորդագրութիւն մը, որուն մէջ նշուեցաւ, որ Արսալի բարձունքներուն վրայ գտնուող Տուար Նժասա շրջանին մէջ ականի մը պայթումին պատճառով նահատակուած են երեք բանակայիններ եւ ծանրօրէն վիրաւորուած է ուրիշ մը:

Բանակի հրամանատարութիւնը գուժեց նահատակ բանակայիններ Պասեմ Մուսա Մուսայի, Էլի Իպրահիմ Ֆրայժէի եւ Օսման Մահմուտ Շտիտի նահատակութիւնը:
Բանակը ուղղաթիռով մը Ռաս Պաալպեքէն Պէյրութի հիւանդանոցներէն մէկը փոխադրեց չորրորդ բանակայինը, որ ծանրօրէն վիրաւորուած էր:

Պէտք է նշել, որ երէկ կէսօրին բանակի հրամանատարը ստուգեց Ռաս Պաալպեքի եւ Քաայի բարձունքներուն վրայ ՏԱՀԵՇ-ի դէմ ճակատամարտին մասնակցող լիբանանեան բանակի զօրամասերուն դիրքերը` անձամբ հետեւելով ճակատամարտի մանրամասնութիւններուն:
Զօր. Աուն այցելեց նաեւ Ռաս Պաալպեքի ազատագրուած տարածքները, ուր հանդիպեցաւ բանակի սպաներուն եւ բանակայիններուն հետ` անոնց ուղղելով անհրաժեշտ ցուցմունքները, ինչպէս նաեւ շուտափոյթ ապաքինում մաղթելով վիրաւոր զինուորներուն:
Իսկ երեկոյեան հանրապետութեան նախագահը այցելեց վիրաւոր բանակայիններուն. ան բարձր գնահատեց անոնց զոհողութիւնները եւ անոնց ապաքինում մաղթեց:
Նախագահ Աուն շեշտեց, որ զինք չի զարմացներ պատերազմի ճակատ վերադառնալու բանակայիններուն կորովը` աւելցնելով, որ այս է լիբանանեան բանակը, եւ բանակայիններն են Լիբանանի հերոսները:
Արեւմտեան Քալամունը Եւս Կը Գտնուի Ազատագրուելու
Ճամբուն Վրայ. Հըզպալլա Կ՛ազատագրէ Զամարանիի Անցքը

Լիբանանեան բանակին յայտարարած Ռաս Պաալպեքի եւ Քաայի բարձունքներուն ազատագրումի գործողութեան զուգահեռ, սուրիական բանակը եւ Դիմադրութիւնը յայտարարեցին այլ ճակատամարտ մը` ՏԱՀԵՇ-էն մաքրագործելու համար Արեւմտեան Քալամունը:
«Բարձունքներու արշալոյսը» գործողութեան հետ միաժամանակ Արեւմտեան Քալամունի մէջ շղթայազերծուած զինուորական գործողութիւնը կրեց «Ուաին օտթոմ օտնա» անունը:
Հըզպալլայի պատերազմական տեղեկատուութիւնը շաբաթ երեկոյեան հաղորդեց, որ Դիմադրութիւնը կրցած է ազատագրել Արեւմտեան Քալամունի 87 քառ. քմ` ՏԱՀԵՇ-ի բռնագրաւած աւելի քան 155 քառ. քմ տարածքէն:
Բախումներուն ընթացքին սպաննուեցան մեծ թիւով ՏԱՀԵՇ-ի անդամներ: Իսկ ճակատամարտի սկիզբէն երկու ժամ ետք 50 ահաբեկիչներ իրենց ընտանիքներով անձնատուր եղան Դիմադրութեան մարտիկներուն եւ սուրիական բանակին:
Երէկ երկրորդ օրն ըլլալով սուրիական բանակն ու Դիմադրութեան մարտիկները Արեւմտեան Քալամունի մէջ շարունակեցին ՏԱՀԵՇ-ի դիրքերուն ռմբակոծումն ու կռիւները` ազատագրելով ռազմավարական դիրք նկատուող Մուսել բարձունքը:
Ազատագրուեցան նաեւ Զամարանիի անցքը, ինչպէս նաեւ Շաապաթ Քատի, Մատ Մահպաս, Խըրպեթ Քար Ալի, Շաապաթ Շանշար, Շմայս, Տուար Խանժար, Շաապաթ Սուքի, Շաապաթ Սահրիժ, Հարֆել Ժաֆըր եւ Զուայթինի բարձունքները:
Իսկ արեւելեան կողմէն սուրիական բանակն ու Դիմադրութեան մարտիկները ազատագրեցին Ժարաժիրի բարձունքները, Ուատի Մեսուտը, Ուատի Ապու Խտէյրը, Շաապաթ Սրուրը, Խըրպեթ Այլէն, Ռապիէ Նահհաշը եւ Պրիժը:
Կը նախատեսուի, որ սուրիական բանակն ու Հըզպալլայի մարտիկները մօտիկ ապագային ազատագրեն նաեւ Ժապալ Միրին, որ ՏԱՀԵՇ-ի կողմէ բռնագրաւուած ռազմավարական միակ բարձունքն է:
Զօրակցութիւն Լիբանանեան Բանակին
«Բարձունքներու արշալոյսը» գործողութեան յայտարարութեան լոյսին տակ, արդէն իսկ լիբանանցիներուն զօրակցութիւնը վայելող լիբանանեան բանակը դարձաւ իւրաքանչիւր քաղաքացիի ուշադրութեան առարկան:
ՏԱՀԵՇ-ի դէմ սանձազերծուած պատերազմին առիթով բանակին նկատմամբ լիբանանցիներուն զօրակցութիւնը եղաւ աննախընթաց:
Ռաս Պաալպեքի եւ Քաայի բնակիչները երէկ երեկոյեան ինքնաբուխ մոմավառութիւն մը կազմակերպեցին` առ ի զօրակցութիւն բանակին:
Մար Եաագուպ վանքի մայրապետ քոյր Ակնես Մարիամ Քաայի բնակիչ տիկինները հրաւիրեց վանք` սկսելով բանակայիններուն ճաշ պատրաստելու արշաւ մը, որ բանակին նեցուկ կանգնելու այլ միջոց մըն է:
Թրիփոլիի մէջ խումբ մը տղաք բանակին զօրակցութեան նպատակով սիրոյ անցարգելներ զետեղեցին` անցորդներուն նուիրելով բանակին դրօշները, հնչեցուցին ազգային երգեր եւ Թրիփոլիի բոլոր բնակելի շէնքերուն պատշգամները զարդարեցին բանակի դրօշներով:
Պաալպեքի եւ Հերմելի նահանգապետ Պաշիր Խտըր շրջանի բոլոր քաղաքապետարաններէն պահանջեց բանակը տեղեակ պահել` շրջանին մէջ նշմարուած ապահովական որեւէ արտասովոր երեւոյթի մասին:
Խտըր բոլոր քաղաքապետութիւններէն պահանջեց կազմ ու պատրաստ ըլլալ` ամէն իմաստով օժանդակելու եւ նեցուկ կանգնելու բանակին:
Քաայի քաղաքապետ Պաշիր Մաթար շեշտեց, որ բանակին ներկայութեամբ իրենք ամէն զոհողութիւն պատրաստ են կատարելու` լիբանանեան հողերը ազատագրելու նպատակով:
Ան հաստատեց, որ իրենք պատրաստ են նաեւ զէնք բարձրացնելու եւ բանակին կողքին կռուելու, եթէ կարիք ըլլայ:
Մաթար նշեց, որ Քաայի մէջ Լիբանանեան Կարմիր խաչին հետ գործակցութեամբ արեան տուչութեան արշաւը ժողովրդային ինքնաբուխ արտայայտութիւն մըն էր` բանակին զօրակցելու:
Պետական մակարդակի վրայ, վարչապետ Սաատ Հարիրի շեշտեց, որ ամէն տեսակի զօրակցութեամբ կը հետեւին բանակին մղած ճակատամարտին, որուն շնորհիւ կարելի պիտի ըլլայ ահաբեկչութիւնը Լիբանանէն դուրս շպրտել:
Հարիրի ողջունեց բանակի հրամանատարութիւնը, սպայակոյտն ու ճակատամարտին մասնակցող իւրաքանչիւր զինուոր, որ կը պաշտպանէ Լիբանանի հողն ու քաղաքացիին անվտանգութիւնը:
Պաշտպանութեան նախարար Եաագուպ Սարրաֆ այցելեց վիրաւոր բանակայինները` անոնց մաղթելով շուտափոյթ ապաքինում: Ան հաստատեց, որ բանակին զոհողութիւններուն շնորհիւ պիտի բացուի Լիբանանի յաղթական արշալոյսը:
Սարրաֆ հեռաձայնային հաղորդակցութիւն ստացաւ իրաքցի իր պաշտօնակիցէն` Օրֆան Մահմուտ Հայալիէն, որ Լիբանանին շուտափոյթ յաղթանակ մաղթեց:
Հանրապետութեան նախկին նախագահ Ամին Ժեմայէլ հաստատեց, որ նման պարագայի միայն կարելի է զօրակցիլ բանակին, որ է ու կը մնայ Լիբանանը պահպանելու օրինակելի միջոցը:
Փաղանգաւոր կուսակցութեան ղեկավար, երեսփոխան Սամի Ժեմայէլ շեշտեց, որ բանակը առանձինն կրնայ յաղթական դուրս գալ որեւէ ճակատամարտէ եւ պաշտպանել լիբանանցիները:
Ընկերվար յառաջդիմական կուսակցութեան ղեկավար, երեսփոխան Ուալիտ Ժոմպլաթ յաջողութիւն մաղթեց բանակին` լիբանանեան բարձունքները ահաբեկչութեան լուծէն ազատագրելու:
Մարատա հոսանքի ղեկավար, երեսփոխան Սլէյման Ֆրենժիէ ամբողջական զօրակցութիւն յայտնեց բանակին` շեշտելով, որ հզօր կամքը «Բարձունքներու արշալոյսը» պիտի պսակէ յաղթանակով:
Հաւատարմութիւն դիմադրութեան պլոքի նախագահ, երեսփոխան Մոհամետ Ռաատ շեշտեց, որ Լիբանանի բարձունքներուն վրայ ընթացող ճակատամարտը իրենց ճակատամարտն է, եւ իրենք մնայուն կերպով պիտի օժանդակեն բանակին:
Լիբանանեան ուժեր կուսակցութեան ղեկավար Սամիր Ժահժահ կոչ ուղղեց քաղաքական ուժերուն համախմբուելու «Ժողովուրդ, պետութիւն, բանակ» ոսկեայ տարազին շուրջ: Ան կատարեալ զօրակցութիւն յայտնեց լիբանանեան բանակին:
Հանրապետութեան միւֆթի շէյխ Ապտել Լաթիֆ Տըրիան յաջողութիւն մաղթեց բանակին` շեշտելով, որ «Բարձունքներու արշալոյսը» գործողութիւնը լիբանանեան պետութեան եւ կառավարութեան յաղթանակը կը նկատուի:
Մարոնի համայնքի Պշարա Ռայի պատրիարքը կիրակի օրուան իր քարոզին մէջ շեշտեց, որ իրենք կ՛աղօթեն ահաբեկչութեան դէմ բանակին արձանագրելիք յաղթանակին համար:
Շիի համայնքի գերագոյն խորհուրդի նախագահ, շէյխ Ապտել Էմիր Քապալան շեշտեց, որ Լիբանան իր ժողովուրդով, բանակով եւ դիմադրութեամբ ահաբեկչութեան դէմ լաւագոյն յաղթանակները արձանագրած է:

Նախագահ Աուն շուտափոյթ ապաքինում կը մաղթէ անկարգելաւորներու զօրամասի աժիւտան Սեպուհ Կիրակոսեանին:

LEAVE A REPLY

Please enter your comment!
Please enter your name here