Ատրպէյճան Ռուսական Նորագոյն Սպառազինութեան Գնորդներու Շարքին Է

0
124

ՄՈՍԿՈՒԱ, «Ազատութիւն».- 22 Օգոստոսին, Ռուսիոյ մէջ սկսող «Բանակ 2017» գագաթնաժողով-ցուցահանդէսին, առաջին անգամ ըլլալով պիտի ներկայացուի «S-500» եւ «Անտէյ-400» նորագոյն հրթիռային համակարգերը, որոնց հաւանական գնորդներու ցանկին վրայ կայ նաեւ Ատրպէյճանը՝ ըստ մասնագէտներու:

«Իզվեսթիա» թերթը, յղում կատարելով ռազմական հարցերով փորձագէտներու՝ կը գրէ, որ այս նորագոյն համակարգերը մեծ հետաքրքրութիւն պիտի յառաջացնեն շարք մը հաւանական գնորդներու մօտ:

Մէջբերելով փորձագէտ Անտրէյ Ֆրոլովի խօսքերը՝ թերթը կը գրէ, որ հաւանական գնորդներու ցանկը բաւական մեծ է. անոր մէջ կան Չինաստանը, Հնդկաստանը, Վիեթնամը, Ալճերիան, Ղազախստանը, Ատրպէյճանը, Թուրքիան, Եգիպտոսը, Իրանը, Իրաքը, Քուէյթն ու Քաթարը:

Հաւանական գնորդներու նշեալ համակարգերը պիտի ներկայացուին փակ ցուցադրութեամբ:

«Յայտնի է նաեւ, որ «S-500»ը կրնայ խոցել յայտնի թիրախներէն գրեթէ բոլորը, ներառեալ՝ ամերիկեան թռչող սարքերը», կը գրէ «Իզվեսթիա»:

«Ռուսական բանակը այս համակարգը պիտի ստանայ 2019ին», ըսած է «Ալմազ-Անտէյ» ընկերութեան ղեկավար Ալեքսանտր Վետրով՝ առանց յաւելեալ մանրամասնութիւններ բացայայտելու գաղտնի պահուող սպառազինութեան մասին:

Ռազմական ակադեմիայէն փրոֆ. Վատիմ Քոզիւլի կը գրէ, որ այդ համակարգերը կրնան խոցել թռչող սարքեր՝ մեծ հեռաւորութեան վրայ եւ տիեզերքի մէջ: Նոր համակարգերուն համար ստեղծուած են նաեւ յատուկ նոր հրթիռներ:

Փորձագէտ Անտրէյ Ֆրոլովի կարծիքով՝ «S-500»ի առաջին գնորդը հաւանաբար Հնդկաստանն է, որուն հետ Ռուսիա համապատասխան պայմանագիր ունի:

Նախապէս հաղորդուած էր, թէ Թուրքիա համաձայնած է 2.5 միլիառ տոլար վճարելու՝ ռուսական հակաօդային պաշտպանութեան «S-400» համակարգեր եւ անոնց պատրաստութեան արհեստագիտութիւնը ձեռք բերելու համար։

LEAVE A REPLY

Please enter your comment!
Please enter your name here