Հայաստանի Տնտեսական Աշխուժութեան Ցուցանիշը Աճած Է 6.2 Տոկոսով

0
122

ԵՐԵՒԱՆ, «Նիուզ».- Հայաստանի տնտեսական աշխուժութեան ցուցանիշը Յունուարէն Յուլիս 2017ին 6.2 տոկոսով գերազանցած է նախորդ տարուան նոյն ժամանակահատուածի ցուցանիշը:

Հայաստանի ազգային վիճակագրական ծառայութիւնը ներկայացուցած է երկրի տնտեսական վիճակը բնութագրող ընթացիկ ամփոփումով ստացուած նախնական հիմնական ցուցանիշները: Անկում արձանագրուած է միայն շինարարութեան եւ գիւղատնտեսութեան համախառն արտադրանքի ոլորտներէն ներս:

Շինարարութեան ծաւալը նախորդ տարուան նոյն ժամանակահատուածի համեմատ նուազած է 8.7 տոկոսով: Ելեկտրական ուժի արտադրութեան ոլորտէն ներս Յունուարէն Յուլիս 2017ի ցուցանիշը 7.8 տոկոսով աւելցած է նախորդ տարուան նոյն ժամանակահատուածին համեմատ:

Յունուարէն Յուլիս 2016ի հետ համեմատած՝ այս տարի ծառայութիւններու ծաւալը (առանց առեւտուրի) աճած է 11.8 տոկոսով՝ կազմելով 774 միլիառ 537.2 միլիոն դրամ, իսկ գիւղատնտեսութեան համախառն արտադրանքի ծաւալը նուազած է 2.1 տոկոսով՝ կազմելով 334 միլիառ 833 միլիոն դրամ:

Առեւտուրի շրջանառութիւնը աւելցած է 12.2 տոկոսով եւ կազմած 1 եռիլիոն 346 միլիառ 761.6 միլիոն դրամ: Արդիւնաբերական արտադրանքի ծաւալը՝ 899 միլիառ 590.5 միլիոն դրամ, 12.7 տոկոսով աւելի՝ Յունուարէն Յուլիս 2016ին հետ համեմատած: Միջին ամսական անուանական աշխատավարձը աճած է 2.7 տոկոսով (190 հազար 397 դրամ): Պետական հատուածի միջին ամսական անուանական աշխատավարձը կազմած է 160 հազար 499 դրամ՝ մնալով նախորդ տարուան նոյն ժամանակահատուածի ցուցանիշին հաւասար, իսկ մասնաւոր հատուածէն ներս կազմած է 227 հազար դրամ՝ աճելով 3.7 տոկոսով: Արտաքին ապրանքաշրջանառութեան ծաւալները Յունուարէն Յուլիս 2016ի հետ համեմատած՝ աճած են 26 տոկոսով (3 միլիառ 346.8 միլիոն տոլար): Արտածումները աճած են 21.6 տոկոսով (1 միլիառ 185.1 միլիոն տոլար), իսկ ներածումը՝ 28.5 տոկոսով (2 միլիառ 161.7 միլիոն տոլար):

LEAVE A REPLY

Please enter your comment!
Please enter your name here