«Ֆէսպուք»ի Ղեկավար Կազմի Անդամ Պոլսահայ Արի Քէշիշօղլու Խօսեցաւ Նոր Ծրագիրներու Մասին

0
257

«Հիւրրիյէթ» կը հաղորդէ, թէ «Ֆէյսպուք» ընկերային ցանցը մարդասիրական իր նոր առաքելութիւններուն համար բարձր պաշտօնի կոչած է պոլսահայ Արի Քէշիշօղլուն։

Ընկերային այս ցանցը, որ աւելի քան 2 միլիառ օգտատէր ունի, այսինքն աշխարհի բնակչութեան մէկ քառորդը «Ֆէյսպուք»ի մշտական օգտատէր է, հիմնուած էր մարդիկ առցանց գետնի վրայ իրարու մօտեցնելու եւ մերձեցնելու նպատակով։ Բայց այժմ, «Ֆէյսպուք»ի ղեկավար մարմինը այլ առաքելութիւններ ալ որդեգրած է եւ անոնց գլուխաւորը մարդասիրական առաքելութիւնը եւ կեանքին իմաստ տալն է։

«Հիւրրիյէթ» ընկերային ցանցի նոր ծրագիրներուն մասին խօսելու նպատակով՝ հարցազրոյց մը կատարած է Արի Քէշիշօղլուի հետ, որ «Ֆէյսպուք Թուրքիյէ»ի, Միջին Արեւելքի ու Ափրիկէի տարածքաշրջանային տնօրէնն է։

Արի Քէշիշօղլու կը պատմէ, որ «Ֆէյսպուք»ը կը թեւակոխէ ուշագրաւ հանգրուանէ մը ներս։ «Նկատեցինք, որ «Ֆէյսպուք»ը միայն մարդիկը իրարու մօտեցնելու համար հարթակ մը պէտք չէ ըլլայ եւ պէտք է ծառայէ նաեւ մարդասիրական ու ընկերային կարեւոր ձեռնարկներու։ Այդ պատճառով ալ բանիմաց հաւաքականութիւններ մեծապէս կարեւոր են մեզի համար։ Թուրքիոյ նման երկրի մը մէջ, ուր համացանցէ օգտուողներուն 97 տոկոսը «Ֆէյսպուք»ի ալ օգտատէր է, մեծ յաջողութեամբ կարելի է այսպիսի կարեւոր ծրագիրներ կեանքի կոչել», ըսաւ Արի Քէշիշօղլու՝ պատմելով, որ Թուրքիայէն ներս կան յաջողած բազմաթիւ ծրագիրներ, ինչպէս քաղցկեղի դէմ պայքարի ծրագիրը, որ «Ֆէյսպուք»ի վրայ ծնունդ առաւ, իսկ ապա հիմնուեցաւ յատուկ միութիւն մը, որ ազդեցիկ գործունէութիւն կը տանի։ Ուրիշ օրինակ է «Իմ մազս քու մազդ է» արշաւը, որ նոյնպէս քաղցկեղի դէմ պայքարի ծիրէն ներս սկսաւ եւ ընդգրկեց լայն զանգուածներ»։

Ան շեշտեց, որ «Ֆէյսպուք»ի հիմնադիր Մարք Զուքըրպըրկ այս ծրագիրներուն մասին կը խօսի իր բանախօսութիւններուն ընթացքին։

Արի Քէշիշօղլու, խօսելով իր պատասխանատուութեան տակ գտնուող շրջանին մասին՝ ըսաւ, որ Միջին Արեւելքի ու Ափրիկէի մէջ 1.5 միլիառ մարդ կ՛ապրի, սակայն միայն 259 միլիոնն է, որ ամէն ամիս «Ֆէյսպուք» կը գործածէ։ Գալով Թուրքիոյ, անիկա աշխարհի մէջ հազուադէպ երկիրներէն մէկն է ուր 47 միլիոն բնակիչներ կ՛օգտուին համացանցէն եւ այդ ցուցանիշէն 44 միլիոնն ալ «Ֆէյսպուք»ի օգտատէր է. այսինքն համացանցէն օգտուողներու 97 տոկոսը նաեւ «Ֆէյսպուքէն կ՛օգտուի։

LEAVE A REPLY

Please enter your comment!
Please enter your name here