Ամերիկեան Ընկերութիւնը Կը Ծրագրէ Կենցաղային Աղբի Վերամշակումով Ուժանիւթ Արտադրող Կայան Կառուցել

0
110

ԵՐԵՒԱՆ, «Արմռատիօ».- Ուժանիւթի ենթակառուցուածքներու եւ բնական պաշարներու նախարար Աշոտ Մանուկեան Երեքշաբթի, 22 Օգոստոսին հանդիպեցաւ «Ճեներըլ Էլեքթրիք» ընկերութեան Ռուսիոյ եւ ԱՊՀ երկիրներու գծով տարածաշրջանային տնօրէն Իվան Սապրիքինի գլխաւորած պատուիրակութեան հետ:

Նախարարը ամերիկեան ընկերութեան պատուիրակներուն ներկայացուց ուժանիւթի ոլորտէն ներս իրականացուող ծրագիրներն ու անոնց զարգացման հեռանկարները: Նախարարը դրական գնահատեց ամերիկեան ընկերութեան կողմէ՝ Հայաստանի մէջ իրականացուող ներդրումային ծրագիրներուն մասնակցութիւնը ու անոնց զարգացման հեռանկարները:

Սապրիքի յայտնեց, որ «Ճեներըլ Էլեքթրիք» ընկերութիւնը հետաքրքրուած է յատկապէս Հրազդանի մէջ կենցաղային աղբի վերամշակումով ելեկտրականութիւն արտադրող կայանի կառուցման ծրագիրով: Այդ նպատակով «Ճեներըլ Էլեքթրիք» ընկերութիւնը կը ներկայացնէ զանազան տեսակի շարժիչներ եւ անոնց օգտագործման եղանակները:

Հանդիպման ընթացքին պայմանաւորուածութիւն ձեռք բերուեցաւ միասնաբար ուսումնասիրելու Հրազդանի մէջ կենցաղային աղբի վերամշակման կայանի կառուցման կարելիութիւնները:

LEAVE A REPLY

Please enter your comment!
Please enter your name here