Ընկերային Ցանցերու Մէջ Գրառումներու Պատճառով Ձերբակալութիւնները Կը Շարունակուին Թուրքիոյ Մէջ

0
117

ՊՈԼԻՍ, «Մարմարա».- Թուրքիոյ ներքին գործոց նախարարութիւնը վիճակագրական տուեալներ հրապարակեց այն ձերբակալութիւններուն մասին, որոնք կատարուած են 14- 21 Օգոստոսի միջեւ, «ահաբեկչութեան հետ կապեր ունենալու» մեղադրանքով։

Միայն անցեալ շաբաթ, ոստիկանատուն տարուած են 997 անձեր, համացանցային ընկերային ցանցերու մէջ իրենց կատարած գրառումներուն պատճառով։ Իրաւապահ մարմինները վերջին մէկ շաբթուան ընթացքին ուսումնասիրած են 682 անձերու կայքէջերը, եւ անոնց մէկ մասը հսկողութեան տակ առնուած է՝ իրենց կասկածելի գրառումներուն համար։ Ոստիկանատուն տարուած անձերը կը մեղադրուին «ահաբեկչական կազմակերպութեան ի նպաստ քարոզչութիւն կատարելու», «ահաբեկչական կազմակերպութիւնները գովաբանելու», «ահաբեկչական կազմակերպութեան հետ կապ ունենալու վերաբերեալ բացայայտ յայտարարութիւն ընելու», «պետական արժէքները վիրաւորելու», ինչպէս նաեւ՝ «ատելութիւն սերմանող արտայայտութիւններ կատարելու» յանցանքներով։

Նախորդող շաբաթ, ընկերային ցանցերու մէջ կատարուած գրառումներու համար ձերբակալուած էին առնուազն 152 անձեր։

LEAVE A REPLY

Please enter your comment!
Please enter your name here