Էնտրու Շոֆըր՝ ԵԱՀԿ Մինսկի Խմբակի Ամերիկացի Նոր Համանախագահ

0
110

ՈՒԱՇԻՆԿԹԸՆ, «Ամերիկայի Ձայն».- Երկուշաբթի, 28 Օգոստոսէն սկսեալ, ԵԱՀԿ Մինսկի խմբակի Միացեալ Նահանգներու համանախագահ պիտի դառնայ Էնտրու Շոֆըրը. այս մասին յայտարարած է ԵԱՀԿ Մինսկի խմբակի ամերիկացի ժամանակաւոր համանախագահ Ռիչըրտ Հոկլընտ:

«Շատ ուրախ եմ յայտնելու, որ Երկուշաբթի օրուընէ սկսեալ, ամերիկացի համանախագահը պիտի ըլլայ Էնտրու Շոֆըրը: Ան շատ փորձառու, բարձրաստիճան դիւանագէտ մըն է, որ վերջերս ծառայած էր միջազգային կազմակերպութիւններու մէջ իբրեւ Միացեալ Նահանգներու առաքելութեանց ժամանակաւոր հաւատարմատար», ըսած է Հոկլընտ եւ աւելցուցած. «Ամերիկեան ներկայ վարչակազմը այս (Արցախի) հարցով նոր կեցուածք չունի: Ամերիկեան մօտեցումները այս հարցով անփոփո՛խ են՝ անկախ համանախագահի փոփոխութենէն»:

Հոկլընտ նաեւ նշած է, թէ Շոֆըր Կիպրոսի եւ այլ հակամարտութիւններու կարգաւորման ջանքերուն մասնակցած է՝ կարեւոր փորձառութիւն ձեռք ձգելով։ «Կը հաւատամ, որ արտաքին գործոց նախարարութիւնը եւ արտաքին գործոց նախարարը ընտրած են Միացեալ Նահանգները ներկայացնող շատ լաւ համանախագահ մը», աւելցուցած է Հոկլընտ՝ եզրակացնելով. «Նոր համանախագահը այժմ կը տիրապետէ ղարաբաղեան հակամարտութեան կարգաւորման գործընթացին հետ կապուած բոլոր տեղեկութեանց եւ պատրաստ է ստանձնելու պարտականութիւնները»:

LEAVE A REPLY

Please enter your comment!
Please enter your name here