Մահճուպեան Չի Կարծեր, Որ Թուրք-Իրանեան Գործակցութիւնը Պիտի Խորանայ

0
115

ԵՐԵՒԱՆ, «Էրմենիհապեր».- Թուրքիոյ նախկին վարչապետ Ահմետ Տաւութօղլուի նախկին աւագ խորհրդական Էթիէն Մահճուպեան թուրք-իրանեան յարաբերութիւններուն մասին յօդուած մը հրապարակած է թրքական «Տիքեն» թերթին մէջ՝ նշելով, որ ներկայիս աստիճանաբար սերտացող այդ կապերը պայմանաւորուած են բացառապէս հետեւեալ կէտերով.

«Իսլամական պետութիւն» ահաբեկչական կազմակերպութեան դէմ միասնական պայքար.
Համագործակցութիւն սահմանային ապահովութեան շուրջ:
Համագործակցութիւն ապահովական գօտիներու հաստատման ջանքերուն մէջ:

Սակայն, ըստ Մահճուպեանի, վերոնշեալ հարցերէն դուրս համաչափութիւն եւ համակարգուածութիւն չկայ թուրք-իրանեան յարաբերութեան մէջ:

Մասնաւորապէս անդրադառնալով հիւսիսային Իրաքի Քրտական ինքնավար մարզին մէջ երկու երկիրներու կեցուածքներուն՝ Մահճուպեան կը նկատէ, որ այդ հարցը Իրանի քաղաքական օրակարգի գլխաւոր խնդիրներէն մէկը չէ՛: «Իրանի քաղաքականութեան հետաքրքրութիւնը կը տարածուի աւելի դէպի Սուրիա, Լիբանան եւ Իրաք։ Այս երկիրներուն մէջ գործող զինեալ խմբաւորումներուն մէկ մասը անուղղակիօրէն կապուած է Իրանի հետ, մինչ Թուրքիա կը հանդիսանայ օտար ուժ մը», գրած է Մահճուպեան։

Անդրադառնալով նաեւ Սուրիոյ քիւրտերուն տրամադրուող ամերիկեան զինուորական աջակցութեան եւ անոր նկատմամբ Անգարայի մտավախութեանց՝ ան նշած է, որ այդ իրականութեան մէջ մեղաւորը Թուրքիա՛ն է, որովհետեւ ժամանակին չկրցաւ իր ազդեցութիւնը լաւապէս տարածել այդ շրջանին մէջ:

Մահճուպեան ապա հասած է այն եզրակացութեան, որ Թուրքիա-Իրան համագործակցութիւնը դժուարին գործընթաց մը պիտի ըլլայ, քանի որ կան շարք մը հարցեր, որոնց մէջ երկու երկիրները նման կեցուածքներ չունին։

LEAVE A REPLY

Please enter your comment!
Please enter your name here