Շարլ Ազնաւուրի Աստղը՝ Հոլիվուտի «Համբաւի Ճեմուղի»ին Վրայ

0
137

ՀՈԼԻՎՈՒՏ.- Հինգշաբթի, 24 Օգոստոսին, Հոլիվուտի «Համբաւի Ճեմուղի»ին վրայ տեղի ունեցաւ աշխարհահռչակ երգիչ, դերասան եւ բարերար Շարլ Ազնաւուրի (Շահնուր Վաղինակ Ազնաւուրեան) նուիրուած աստղին պաշտօնական բացումը, «Փենթէյճըս» (Pantages) թատերասրահին մօտերը գտնուող մայթին վրայ:

Հոլիվուտի առեւտրական գրասենեակը, որ կ՛որոշէ իւրաքանչիր տարուան մեծարեալները, այս տարի ընտրած էր նաեւ Ազնաւուրը, որուն անունը առաջադրուած էր Քալիֆորնիոյ նահանգային Ծերակոյտի նախագահ Քեւըն տէ Լիոնի կողմէ։

Ազնաւուր անձամբ ներկայ էր ձեռնարկին։ 93ամեայ երգիչին անունով աստղը 2618-րդն է իր տեսակին մէջ։

Բացման արարողութեան ընթացքին, Ազնաւուր իր սրտի խօսքը արտասանեց ու ըսաւ. «Ես թէ՛ ֆրանսացի եմ եւ թէ հայ եմ։ Չեմ կրնար տարանջատել երկու պատկանելիութիւններս, ինչպէս որ կաթով սուրճին մէջ չես կրնար բաժնել կաթը սուրճէն։ Իմ հայկական անունը Շարլ Ազնաւուրեան է, իսկ ֆրանսականը՝ Շարլ Ազնաւուր։ Հոյակա՛պ է ունենալ երկու մշակոյթները միակ նպատակի մը ծառայեցնելու կարելիութիւնը։ Ֆրանսերէնը իմ աշխատանքային լեզուն է, իսկ հայերէնը՝ իմ ընտանեկա՛ն լեզուն։ Այս աստղը ստանալէ ետք, ես նաեւ քիչ մը քալիֆորնիացի եմ, որովհետեւ դուստրս եւ թոռներս հոս են»։ Ազնաւուր աւելցուց, թէ ինք միշտ կը խուսափի անգլերէնով ելոյթ ունենալէ, քանի որ իր անգլերէնը այնքան ալ լաւ չէ։
Արարողութեան ընթացքին Ազնաւուրին ներկայացուց անոր բարեկամը, դերասան եւ բեմադրիչ Փիթըր Պակտանովիչ։

Յիշեցնենք, որ Շարլ Ազնաւուր միջազգային շուկայի վրայ մրցանշային 180 միլիոն ձայնասկաւառակ վաճառած է։ Ան իր 70 տարուան մասնագիտական ասպարէզին ընթացքին ձայնագրած է 1400 երգ, որոնց ջախջախիչ մեծամասնութեան հեղինակը ի՛նք է։ Նաեւ, հրապարակած է 390 ալպոմներ՝ երգելով ֆրանսերէն, հայերէն, անգլերէն, ռուսերէն, գերմաներէն, իտալերէն ու սպաներէն։

LEAVE A REPLY

Please enter your comment!
Please enter your name here