Սերժ Սարգսեան Վերահաստատեց ԼՂ Հակամարտութեան Խաղաղ Կարգաւորման Վերաբերեալ Հայաստանի Դիրքորոշումը

0
121

ԵՐԵՒԱՆ.- Հայաստանի նախագահ Սերժ Սարգսեան, Երեւանի մէջ Թուրքմէնիստանի նախագահ Կուրպանկուլի Պերտիմուհամետովի հետ հանդիպման ընթացքին, ներկայացուց Հայաստանի դիրքորոշումը Լեռնային Ղարաբաղի հակամարտութեան կարգաւորման վերաբերեալ:

Թուրքմէնիստանի նախագահին հետ հանդիպումէն ետք, նախագահական նստավայրին մէջ, լրագրողներու հետ հանդիպման մը ընթացքին, ըստ «Արմէնփրէս»ի, այս մասին յայտնեց Հայաստանի նախագահը:

«Բանակցութիւններու ընթացքին իմ կողմէ մէկ անգամ եւս վերահաստատուած է Հայաստանի դիրքորոշումը՝ Լեռնային Ղարաբաղի հակամարտութեան բացառապէս խաղաղ կարգաւորում՝ հիմնուած միջազգային իրաւունքի չափանիշներու եւ սկզբունքներու, ՄԱԿի կանոնադրութեան դրոյթներուն վրայ, մասնաւորապէս՝ անոնց, որոնք հաւասարապէս կը վերաբերին ուժի եւ անոր սպառնալիքի չկիրառման, պետութիւններու տարածքային ամբողջականութեան, իրաւահաւասարութեան եւ ժողովուրդներու ինքնորոշման իրաւունքին», ընդգծեց Սերժ Սարգսեան:

Նախագահ Սարգսեան նաեւ յայտնեց, որ ընդգծուած է հակամարտութեան գօտիին վրայ իրավիճակի սրացման կանխարգիլման, իրավիճակի կայունացման եւ միջազգային հանրութեան միջնորդական իրաւագիրով օժտուած միակ ձեւաչափի՝ ԵԱՀԿ Մինսկի խումբի համանախագահ երկիրներու ջանքերուն ծիրէն ներս խաղաղ գործընթացի յառաջ մղման համար պայմաններու ստեղծման ուղղուած համաձայնութիւններու իրականացման կարեւորութիւնը:

LEAVE A REPLY

Please enter your comment!
Please enter your name here