Գերմանիայի սոցիալ-դեմոկրատական կուսակցությունն Ադրբեջանից պահանջել է ազատ արձակել Մեհման Ալիևին

0
314

ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Գերմանիայի սոցիալ-դեմոկրատական կուսակցության մարդու իրավունքների գծով խոսնակ, Եվրոպայի խորհրդի խորհրդարանական վեհաժողովի անդամ (ԵԽԽՎ) Ֆրենկ Շվաբեն հայտնել է իր ներկայացրած կուսակցության դիրքորոշումը Ադրբեջանում վերջերս տեղի ունեցած ձերբակալությունների վերաբերյալ:

Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական գործակալությունը:

«Նախորդ Կիրակի Ադրբեջանի կառավարությունը ձերբակալել է «Թուրան» լրատվական գործակալության տնօրեն Մեհման Ալիևին: Ինչպես անկախ մամուլին ճնշելու մյուս դեպքերում, Մեհման Ալիևին նույնպես առաջադրված են հարկերից խուսափելու, հափշտակության և անօրինական բիզնես գործունեություն ծավալելու հատկանիշներով մեղադրանքներ: Մեհման Ալիևին սպառնում է 7 տարվա ազատազրկում: Սոցիալ-դեմոկրատական կուսակցությունը պահանջում է անմիջապես ազատ արձակել նրան»,-ասված է հայտարարության մեջ:

Կուսակցությունը հայտարարության մեջ նշել է, որ Մեհման Ալիևի գլխավորած լրատվական գործակալությունն Ադրբեջանում ազատ մամուլի վերջին կենսունակ ներկայացուցիչն էր:

«Մեհման Ալիևի ղեկավարած «Թուրան» գործակալությունը Ադրբեջանում ազատ մամուլի վերջին մնացորդն էր: Ադրբեջանի կառավարությունը հարձակում գործեց անկախ մամուլի վերջին մնացորդի վրա ևս: Հուլիսին Ադրբեջանի կառավարությունը ֆինանսական խարդախության հատկանիշներով ազատազրկման ենթարկեց ընդդիմադիր «Ազատություն» թերթի ֆինանսական տնօրեն Ֆաիք Էմիրլիին: Հունիս ամսից սկսած ընթանում է ինտերնետային հեռուստատեսության տնօրեն Ազիզ Օրուջովի գործով դատավարությունը: Նրա նկատմամբ ևս առաջադրված է հարկերից խուսափելու մեղադրանք: Մեհման Ալիևի նկատմամբ արվածը Ադրբեջանի անկախ մամուլի ներկայացուցիչներին ահաբեկելու վերջին փորձն է, որն իրականացնում է այդ երկրի ղեկավարությունը: Ադրբեջանի իշխող ռեժիմի կողմից առաջադրվող մեղադրանքները հստակորեն դիտարկվում են: Սոցիալ-դեմոկրատական կուսակցությունը Ադրբեջանի իշխանություններից պահանջում է անմիջապես ազատ արձակել Մեհման Ալիևին և հարգել մամուլի ազատությունը: Ադրբեջանի կառավարությունը պետք է հետևի Մարդու իրավունքների Եվրոպական կոնվենցիայով ստանձնած պարտավորություններին»,- եզրափակված է հայտարարությունը:

Ադրբեջանի իշխանություններին Մեհման Ալիևի ազատ արձակման պահանջ են ներկայացրել նաև Նորվեգիայի և Գերմանիայի կառավարությունները:

Մեհման Ալիևի ձերբակալությանը Անդրադարձել է ԱՄՆ սենատոր Մարկո Ռիբիոն, ով նույնպես պահանջել է ազատ արձակել «Թուրան»-ի տնօրենին:

«Ադրբեջանի իշխանություններից պահանջում եմ անմիջապես ազատ արձակել հայտնի լրագրող Մեհման Ալիևին: Ոչ մամուլի ազատության դեմ ճնշումներին»,- իր թվիթերյան միկրոբլոկում գրել է սենատորը:

Ադրբեջանցի հայտնի իրավապաշտպաններ Նովելլա Ջաֆարովան, Սաիդա Գոջամանլըն, Սադդաթ Բանանյարլըն, Ավազ Հասանովը, Միրավի Գահրամանլըն, Արզու Աբդուլլաևան և Զելիհա Թահիրովան դիմել են Ադրբեջանի նախագահ Իլհամ Ալիևին` հայցելով Մեհման Ալիևին առաջադրված մեղադրանքների շուրջ արդար հետաքննություն, և խնդրել ազատ արձակել նրան:

Ադրբեջանում օգոստոսի 24-ին ձերբակալվել է անկախ «Թուրան» լրատվական գործակալության տնօրեն Մեհման Ալիևը:

ԶԼՄ-ների հաղորդմամբ` Մեհման Ալիևը ձերբակալվել է հարկերից խուսափելու կասկածանքով:

Ադրբեջանի Հարկային նախարարության հարկային հանցագործությունների նախաքննության դեպարտամենտը օգոստոսի 16-ի առավոտյան լայնամասշտաբ խուզարկություն էր սկսել «Թուրան»-ում:

Մինչ այդ գործակալությունում հարկային աուդիտ էր մեկնարկել: Աուդիտի արդյունքում հարկայինը «Թուրան»-ին ներկայացրել էր 37 հազար մանաթի պարտք, որը գործակալությունը պետք է վճարի: Հարկայինի հիմնավորմամբ` գործակալությունն իր եկամուտները պակաս է ցույց տվել, որպեսզի քիչ հարկ վճարի: «Թուրան» գործակալությունն իր հերթին հայտնել էր, որ գործակալությունն անօրինական ոչինչ չի արել, և հարկայինի այս քայլերն ուղղված են «Թուրանի» գործունեության խափանմանը: Հարկային հանցագործությունների նախաքննության դեպարտամենտը 2017-ի օգոստոսի 7-ին «Թուրան» գործակալության դեմ քրեական գործ էր հարուցել, և նախաքննություն էր ընթանում:

http://armenpress.am/arm/news/903562/

LEAVE A REPLY

Please enter your comment!
Please enter your name here