Թուրքիա Կը Բողոքէ Ցուցարարներ Ծեծած Իր Թիկնապահները Ամբաստանող Ատեանին Դէմ

0
121

ԵՐԵՒԱՆ, «Էրմենիհապեր».- Թուրքիոյ արտաքին գործոց նախարարութիւնը 30 Օգոստոսին տարածած է յայտարարութիւն մը, ուր կը բողոքէ ամերիկեան ատեանի այն որոշումին դէմ, որ խաղաղ ցուցարարներ ծեծած նախագահ Էրտողանի 15 թիկնապահներուն հասցէին մեղադրանք կ՛առաջադրէ, նման քայլ մը «անարդար եւ կողմնակալ» որակելով։

«Ամենախի՛ստ ձեւով կը բողոքենք՝ ա՛յն պատճառով, որ այդ մեղադրական եզրակացութիւնը կանխակալ է», կ՛ըսուի յայտարարութեան մէջ, ուր նաեւ կը պնդուի, թէ ամբաստանեալներու շարքին կան որոշ անձեր, որոնք այդ օրը Միացեալ Նահանգներ չէին գտնուէր։

Նախարարութիւնը նաեւ կ՛ընդգծէ, թէ այդ հարցով իրենց բողոքը փոխանցուած է Անգարայի մօտ Միացեալ Նահանգներու դեսպանին:

Յիշեցնենք, որ 29 Օգոստոսին, Էրտողանի 15 թիկնապահներու դէմ մեղադրանքներ առաջադրուեցան՝ նախագահին Ուաշինկթըն կատարած անցեալ այցելութեան ընթացքին ցուցարարներու վրայ յարձակելնուն պատճառով, ինչին իբրեւ հետեւանք՝ վիրաւորուած էր առնուազն 9 հոգի:

Ամբաստանագիրը պատրաստուած էր 19 անձերու դէմ, որոնցմէ 15-ը նախագահ Էրտողանի թիկնապահներէն են։ Ցարդ ձերբակալուած են մեղադրեալներէն միայն երկուքը, որոնց դէմ բացուած դատին առաջին նիստերը պիտի կայանան 7 Սեպտեմբերին։ Նկատի ունենալով, որ ամբաստանեալները ցեղային ատելութեան հիմքով կատարած են իրենց յարձակումը, անոնք կրնան 15 տարուան բանտարկութեան դատապարտուիլ։

LEAVE A REPLY

Please enter your comment!
Please enter your name here