40 Հազար Առաջին Դասարանի Աշակերտ․Հնչեց Առաջին Զանգը

0
199

Այս տարի 1 Սեպտեմբերին դպրոց յաճախած է շուրջ 40 հազար առաջին դասարանի աշակերտ, սակայն 9 դպրոցներ առաջին դասարանցի չեն ունեցած: Այս մասին նշած է Հայաստանի կրթութեան եւ գիտութեան նախարարութեան հանրակրթութեան վարչութեան պետ Աշոտ Արշակեան:

Անոր խօսքով, այդ դպրոցներէն 4-ը կը գտնուի Սիւնիքի մարզին մէջ: Արշակեան նկատել տուած է, որ ընդհանուր առմամբ, այս տարի առաջին դասարանցիներու թիւը աւելցած է. նախորդ տարի այդ թիւը կազմած է 37 հազար:

Բացի այդ, հայաստանեան դպրոցներուն թիւը այս ուսումնական տարեշրջանին կրճատուած է 13-ով: Լուծարուած դպրոցները հիմնականօրէն քաղաքային են եւ պիտի միաւորուին մօտակայ հաստատութիւններու հետ: Լուծարուած 13 դպրոցներուն մէջ ընդհանուր առմամբ կայ 230 ուսուցիչ եւ վարչական աշխատող:

«Կը վստահեցնեմ` այն բոլոր դպրոցները, ուր աշակերտները պիտի շարունակեն իրենց կրթութիւնը, ունին շէնքային լաւ պայմաններ, բաւարար սարքաւորումներ, մանկավարժական անձնակազմ», – նշած է Արշակեան:

Ան նաեւ տեղեկացուցած է, որ Հայաստանի մէջ գործող 21 յատուկ դպրոց պիտի վերակազմակերպուի` դառնալով մանկավարժահոգեբանական աջակցութիւն ցուցաբերող կեդրոն:

Այս տարի համալսարան ընդունուած են 9900 հոգի: Ի դէպ` անոնցմէ 1316-ը պիտի ուսանին անվճար համակարգով: Այս տարի անցեալ տարուան համեմատ համալսարան ընդունուած է 1300 աւելի քիչ ուսանող:

LEAVE A REPLY

Please enter your comment!
Please enter your name here