Ատրպէյճան 2.9 Միլիառ Տոլար Ծախսած է Նշանաւոր Եւրոպացիները Կաշառելու Համար. The Guardian

0
130

Ատրպէյճանի իշխող վերնախաւը 2,9 միլիառ տոլարի գաղտնի ծրագիր իրագործած է` նշանաւոր եւրոպացիներուն վճարելու, շքեղ ապրանքներ ձեռք բերելու եւ բրիտանական ընկերութիւններու միջոցով փող լուալու համար:

Այս մասին կը գրէ The Guardian-ը` նշելով, որ այս տեղեկութիւնները պարզած է սեփական հետաքննութեան արդիւնքով, կը հաղորդէ «Արմենփրես»-ը:

«Բացայայտուած տուեալները ցոյց կու տան` Ատրպէյճանի ղեկավարութիւնը, որ կը մեղադրուի մարդու իրաւունքներու բազմաթիւ խախտումներու, պարբերական կաշառակեր գործարքներու եւ ընտրութիւնները կեղծելուն մէջ, 2012-2014 թուականներուն աւելի քան 16.000 գաղտնի վճարում կատարած է:

Գումարին մէկ մասը ուղղուած է քաղաքական գործիչներու եւ լրագրողներու, որոնք պիտի նպաստէին Իլհամ Ալիեւի դէմ հնչող քննադատութիւնները դադարեցնելուն, նաւթով հարուստ Ատրպէյճանը դրական պատկերով ներկայացնելուն: Եւ անկասկած, գումարը ստացողները տեղեակ եղած են, թէ ուրկէ կու գայ անիկա: Գումարը անոնց հասած է գաղտնի երթուղիով:

Այս բացայայտումները նաեւ ցոյց կու տան Բրիտանիոյ որոշ հատուածի մը անկառավարելի համակարգը` 7 միլիոն սթերլին ծախսուած է Բրիտանիոյ մէջ շքեղ ապրանքներու եւ մասնաւոր դպրոցներու վարձավճարներուն համար:

Ատրպէյճանի եւ Ռուսիոյ վճարային համակարգերու միջոցով ներդրուած դրամական միջոցները անցած են բրիտանական ընկերութիւններ Եւրոպայի առաջատար դրամատուներէն Danske-ի միջոցով, որ վճարումները կատարած է Էսթոնիոյ իր մասնաճիւղին միջոցով:

Danske Bank-ը նշած է, որ փողերու լուացում եւ անօրինական այլ գործարքներ կատարուած են, երբ անկանոն վճարումները առաջին անգամ նկատած է էսթոնիոյ ֆինանսական ոլորտը համակարգող կառոյցը:

Գաղտնի ծրագիրը ստացած է ատրպէյճանական լուացքատուն անունը: Դրամատնային գաղտնի արձանագրութիւնները փոխանցուած են դանիական Berlingske թերթին, Կազմակերպուած յանցաւորութեան եւ կաշառակերութեան մասին հաշուետուութեան նախագիծին, Guardian պարբերականին եւ այլ լրատուամիջոցներու: Փաստաթուղթերը միայն 30 ամսուան շրջանի մը համար են եւ հնարաւոր է, որ սա սառցալերան միայն երեւցող մասն է»,- կը նշէ The Guardian-ը:

LEAVE A REPLY

Please enter your comment!
Please enter your name here