Սփիւռքի Նախարարը Մասնակցեցաւ Պուլկարահայ Նկարիչ Պետիկ Պետրոսեանի Ցուցահանդէսի Բացումին

0
139

Սփիւռքի նախարար Հրանոյշ Յակոբեան Հայաստանի ազգային պատկերասրահին մէջ մասնակցեցաւ  Հայ բարեգործական ընդհանուր միութեան նախաձեռնութեամբ, ՆՍՕՏՏ Գարեգին Բ Ամենայն Հայոց Կաթողիկոսի հովանաւորութեամբ, Հայաստանի մէջ Պուլկարիոյ Հանրապետութեան դեսպանութեան, Հայաստանի ազգային պատկերասրահի եւ Սոֆիայի քաղաքային պատկերասրահի աջակցութեամբ կազմակերպուած պուլկարահայ նկարիչ Պետիկ Պետրոսեանի «Նաւամատոյցներ» խորագիրը կրող ցուցահանդէսի բացումին:

Ձեռնարկին ներկայ էին ՀՀ մշակոյթի նախարար Արմէն Ամիրեան, Մայր Աթոռ Ս. Էջմիածինի արտաքին յարաբերութիւններու եւ արարողակարգի բաժինի տնօրէն Գերաշնորհ Տէր Նաթան արք. Յովհաննիսեան, Հայաստանի մէջ Պուլկարիոյ Հանրապետութեան արտակարգ եւ լիազօր դեսպան Մարիա Փաւլովա Ցոցորկովան, ՀԲԸՄ Հայաստանի ներկայացուցչութեան նախագահ, ՀԲԸՄ Կեդրոնական վարչական ժողովի անդամ Վազգէն Եակուբեան, հասարակական, քաղաքական գործիչներ, արուեստագէտներ:

Աւելի քան 90 գեղանկարչական ու գծագրական աշխատանքները կը ներկայացնեն Հայաստանի, Սիլիստրայի, Պալչիկի, Տոպրուջայի գեղատեսիլ վայրերն ու գողտրիկ անկիւնները: Ընդգրկուած են աշխատանքներ ընտանիքի ու մասնաւոր հաւաքածուներէն, Սոֆիայի քաղաքային պատկերասրահէն, Սիլիստրայի, Վառնայի, Թութրականի, Փազարջիկի, Տոպրիչի, Փլովտիւի պատկերասրահներէն, Սիլիստրայի հայկական առաքելական եկեղեցւոյ, որոնք կը ներկայացնեն բնանկարներ, քաղաքային ու ծովային տեսարաններ, ինչպէս նաեւ մէկ սրբապատկեր եւ եկեղեցւոյ զարդապատկերներու վերատպութիւններ:

Ցուցադրութիւնը պիտի գործէ սոյն թուականի 4 հոկտեմբերէն   3 նոյեմբեր:

LEAVE A REPLY

Please enter your comment!
Please enter your name here