Փայլան Խորհրդարանէն Յստակացում Կը Պահանջէ Պարզանիի Դէմ Սպառնալիքին Կապակցութեամբ

0
118

ՊՈԼԻՍ, «Մարմարա».- Թուրքիոյ խորհրդարանին մէջ քրտամէտ Ժողովուրդներու ժողովրդավարական կուսակցութեան երեսփոխաններէն Կարօ Փայլան նոր դիմում մը կատարեց խորհրդարանի նախագահութեան՝ յստակացում պահանջելով Պոլսոյ Պալմումճու շրջանի կամուրջներէն մէկուն վրայ կախուած պաստառի մը վրայ՝ Իրաքի Քրտական ինքնավար մարզի նախագահ Մասուտ Պարզանիի դէմ յայտնուած սպառնալիքին մասին։

Նշեալ պաստառին վրայ գրուած է հետեւեալը. «Հրեայ ծագումով Պարզանի, մենք շատ լաւ գիտենք, թէ ո՛վ ես դուն եւ ի՛նչ է ցանկութիւնդ։ Քու ցանկութիւնը անկախ Քիւրտիստան մը չէ, այլ մեծն Իսրայէլ մըն է։ Մենք գիշեր մը յանկարծ կրնանք գալ»։

Փայլան դիտել տուաւ, որ պաստառը նաեւ հրեաներու դէմ արարք է։ Ան յիշեցուց, որ այս տարուան Յուլիս 20ին, թուրք ազգայնամոլներ ցոյց մը կատարած էին սինակոկի մը առջեւ, ապա յարձակած էին անոր վրայ։

«Թուրքիոյ հրեաները շարունակ յարձակումներու նշաւակ կը դառնան», ըսաւ Փայլան եւ յիշեցուց, որ իր նախորդ դիմումներուն ցարդ որեւէ պատասխան չէ ստացած։

Փայլան իր հարցագիրը աւարտած է հարցնելով, թէ ցարդ ստուգուա՞ծ է արդեօք հրեաներու դէմ ցոյց կատարողներուն ինքնութիւնը, կամ՝ որեւէ գործողութիւն կատարուա՞ծ է այդ գծով։

LEAVE A REPLY

Please enter your comment!
Please enter your name here