Այս Բռնապետը Սահմաններ Չի Ճանչնար. «Ուաշինկթըն Փոսթ»ը՝ Ալիեւի Մասին

0
171
 

ՈՒԱՇԻՆԿԹԸՆ.- «Ուաշինկթըն Փոսթ» թերթը խմբագրականով մը անդրադարձած է Ատրպէյճանի նախագահ Իլհամ Ալիեւի քաղաքականութեան եւ յատկապէս այլախոհ լրագրող Աֆղան Մուխթարլիի առեւանգումին: «Այս Բռնապետը Սահմաններ Չի Ճանչնար» խորագիրով խմբագրականին մէջ գրուած է.

« 29 Մայիսի երեկոյեան, Վրաստանի մայրաքաղաք Թիֆլիսի մէջ, անկախ լրագրող Աֆղան Մուխթարլի սրճարանէն կը հեռաձայնէ իր կնոջ ու կ՛ըսէ, թէ տուն կու գայ, սակայն այնուհետեւ ան երբեք տուն չի հասնիր: Մէկ օր ետք, անոր կինը կ՛իմանայ, թէ ան դրացի Ատրպէյճանի բանտը կը գտնուի: Հետապնդումներէն խուսափելու համար, Մուխթարլի երկու տարի առաջ փախուստ տուած էր Ատրպէյճանէն: Իբրեւ իր սահմաններէն դուրս գործող ոստիկանական բիրտ պետութիւն՝ Ատրպէյճան զայն վերադարձուց:

Մուխթարլի՝ Ատրպէյճանի բռնատէր նախագահ Իլհամ Ալիեւի բացայայտ քննադատը, կը հետաքննէր Ատրպէյճանի պաշտպանութեան նախարարութեան մէջ զեղծարարութիւնները: Իր անհետացման պահուն, ան Վրաստանի մէջ կը հետաքննէր Ալիեւի անձնական ունեցուածքը եւ Ատրպէյճանի մասին այլ նիւթեր կը հրապարակէր պատկերասփռուող անկախ «Մէյտան Թի.Վի.» կայանէն: Մուխթարլի Պաքուի մէջ վերջին անգամ հարցաքննութեան ենթարկուած էր քաղաքական դրդապատճառներով այլ լրագրողի մը՝ Խատիճա Իսմայիլովայի, հետապնդման գործով, իսկ անկէ ետք ապաստանած էր Վրաստան:

Մուխթարլիի կնոջ եւ փաստաբանին տրամադրած տեղեկութեան համաձայն, սրճարանը լքելէ ետք, լրագրողը Թիֆլիսի իր տան մօտէն առեւանգուած է, ծեծի ենթարկուած եւ աչքերը կապուած վիճակի մէջ երեք տարբեր ինքնաշարժներով տեղափոխուած է Ատրպէյճանի հետ սահմանային անցակէտ, ուր անոր գրպանը դրուած է 10,000 եուրօ: Ատրպէյճանական կողմը զինք ամբաստաբանած է սահմանը ապօրինի անցնելու եւ մաքսանենգութիւն կատարելու յանցանքներով: Ամիսներ ետք ան տակաւին Պաքուի մէջ ձերբակալուած կը մնայ:

Մուխթարլիի գործին մէջ այլ բացասական երանգ մը կայ նաեւ: Ալիեւ իր բռնապետական քայլերը դիւրութեամբ կիրարկած է մէկ այլ երկրի՝ Վրաստանի սիրտին մէջ: Եւրոխորհրդարանը դատապարտած է տեղի ունեցածը, սակայն, արարքը միջազգային ընտանիքի կտրուկ եւ արժանի դատապարտումին չէ արժանացած: Ուաշիկթըն միայն կարճ յայտարարութեամբ մը նշած է, թէ՝ «մտահոգ է առեւանգման դէպքին առնչութեամբ»: Այդպիսի երկչոտութիւն Ալիեւը պիտի առաջնորդէ մտածելու, թէ նախագահ Թրամփի ղեկավարութեամբ՝ Միացեալ Նահանգները իսկապէս մտահոգ չէ մարդկային իրաւունքներու եւ միջազգային օրէնքներու ոտնակոխումներով:

Գիտենք, որ բռնապետները իրարու հետ կը փոխանակեն իրենց փորձառութիւնները, կը փակեն օտար երկիրներու կամ կազմակերպութեանց աջակցութեամբ գործող ոչ-կառավարական կազմակերպութիւնները, կը «նախազգուշացնեն», թէ պետութեան իւրաքանչիւր անկիւն «օտար գործակալ»ներ կը շրջին եւ համացանցի վրայ իսկ կը խեղդեն ազատ արտայայտուելու փորձերը: Ալիեւ հաւանաբար ծանօթ է այլախոհները օտար երկիրներէ առեւանգելու Չինաստանի քայլերուն եւ անոնց անպատիժ մնալու իրողութեան: Մեր տեղեկութիւններով՝ Ալիեւ այլախոհները լռեցնելու մարզին մէջ այնքա՛ն հմտացած է, որ կրնայ բռնատիրութեան դասընթացքներ տալ: Ցաւօ՛ք, այդ դասընթացքներուն մասնակցիլ փափաքողներու պակաս չկայ: Այս գործին մէջ կ՛երեւի նաեւ Վրաստանի կասկածելի դերակատարութիւնը: Արդեօք Եւրոմիութեան կողքին կանգնած ու ժողովրդավարական նկրտումներ ունեցող այս երկիրը մասնակցութիւն ունեցա՞ծ է անդրսահմանային առեւանգումին: Վրաստանի իշխանութիւնները հերքած են իրենց մասնակցութեան փաստը եւ խոստացած՝ հետաքննութիւն կատարել, սակայն ցարդ քիչ բան կատարուած է: Վրաստան պէտք է անյապաղ բացատրութիւն տայ, իսկ Ատրպէյճան պէտք է անյապաղ ազատ արձակէ Մուխթարլին»:

 

 

 

LEAVE A REPLY

Please enter your comment!
Please enter your name here