Երեւանի Մէջ Կը Բացուի Ոսկրախտի Ուսումնական Կեդրոն

0
164

ԵՐԵՒԱՆ, «Փանորամա».- Առողջապահութեան նախարար Լեւոն Ալթունեան Չորեքշաբթի, 4 Հոկտեմբերին ընդունեց «Քոլոմպիա» համալսարանի բժշկութեան եւ վիրաբուժութեան քոլեճի ոսկորներու հիւանդութիւններու ծրագիրի տնօրէն, միջազգային կրթութեան փոխնախագահ փրոֆ. Ճան Պիլեզիկեանը:

Հայաստանի առողջապահական համակարգին երկար տարիներէ ի վեր օժանդակութիւն ցուցաբերող փրոֆեսէօրի այս անգամուան այցելութիւնը Հայաստան առաւել բեղմնաւոր է:

Ճան Պիլեզիկեանի գործադրած ջանքերուն շնորհիւ, ոսկրախտի (օսթէոփորոզ-osteoporosis) միջազգային հիմնադրամը եւ Տենսիթոմեթրի (densitometry-խտաչափութիւն) համաշխարհային ընկերակցութիւնը Օսթէոփորոզի հայկական ընկերակցութեան հետ համատեղ Հայաստանի մէջ առաջին անգամ ըլլալով կազմակերպած են տենսիթոմեթրի միջազգային ուսուցում, որ պիտի տայ միջազգային վկայական եւ տենսիթոմեթրի մասնագէտ աշխատելու հնարաւորութիւն: Նախօրէին մեկնարկած Երեւանի դասընթացքին մասնակցեցան Կեդրոնական Ասիոյ եւ Արեւելեան Եւրոպայի 15 երկիրներէ բժիշկներ:

Այս բոլորը տեղեկացնելով նախարարին՝ Պիլեզիկեան ներկայացուց նաեւ կրթական եւ գիտական յառաջիկայ իր ծրագիրները: Ան յայտնեց, որ 5 Հոկտեմբերին Հայաստանի Ամերիկեան համալսարանին մէջ կը կայանայ Օսթէոփորոզի միջազգային 11րդ գիտաժողովը: Միացեալ Նահանգներու առաջատար բժշկական ընկերակցութիւններու ուղեցոյցներուն վրայ հիմնուած դասախօսութիւնները Հայաստանի բժիշկներուն կը ներկայացնեն օսթէոփորոզի կանխարգիլման եւ բուժման ժամանակակից ձեւերը:

Պիլեզիկեանի նախաձեռնութեամբ՝ Երեւանի մէջ պիտի բացուի Օսթէոփորոզի ուսումնական կեդրոն: Պիլեզիկեան նախարար Լեւոն Ալթունեանին ներկայացուց նաեւ այդ կեդրոնին գծով իրականացուելիք աշխատանքները:

LEAVE A REPLY

Please enter your comment!
Please enter your name here