«Միայն Ժողովրդավար Թուրքիան Կրնայ Կապ Ունենալ Հայաստանի Հետ», Կարօ Փայլան Յայտնեց Երեւանի Պետական Համալսարանի Ուսանողներուն

0
191

Թուրքիոյ խորհրդարանի հայ երեսփոխան Կարօ Փայլան հանդիպեցաւ Երեւանի պետական համալսարանի ուսանողներուն հետ եւ պատասխանեց անոնց հարցումներուն:

«Հայաստանի մէջ երիտասարդները տեսնելով` ես սկսայ այլ կերպ մտածել Հայաստանի ապագայի մասին», շեշտեց Կարօ Փայլան: «Շատ ուրախ եմ, որ Հայաստան կը գտնուիմ եւ յատկապէս Երեւանի պետական համալսարանի մէջ ձեզի հետ կը հանդիպիմ: Իբրեւ պատգամաւոր, առաջին անգամն է, որ Հայաստան կը գտնուիմ եւ ուրախ եմ, որ այս անգամ աւելի ուժեղ Հայաստան կը տեսնեմ: Թուրքիոյ մէջ դժբախտաբար պայմանները աւելի վատ են եւ ամէն օր աւելի կը վատանան»:

Փայլան նշեց, որ Թուրքիոյ եւ Հայաստանի սահմանը 25 տարի է` փակ է, եւ այդպէս ալ պիտի շարունակուի, որովհետեւ Թուրքիան տակաւին կը ղեկավարեն ազգայնականները: Ան ընդգծեց, որ սահմանադրական փոփոխութենէ ետք Էրտողանը բռնատէր դարձաւ եւ դաշինք կնքեց Ազգայնական կուսակցութեան հետ: «Հիմա ալ Թուրքիան ազգայնականութեան ճանապարհին է: Մեր կուսակցութիւնը իր թեկնածուն պիտի ունենայ 2019 թուականին, որպէսզի այս ճամբան չշարունակուի եւ վերջանայ», նշեց Կարօ Փայլան, ապա շեշտեց, որ միայն ժողովրդավար Թուրքիան կրնայ կապ ունենալ Հայաստանի հետ:

«Հայերը Թուրքիոյ մէջ ազգային փոքրամասնութիւն են: Ընդամէնը 60 հազար հայ կայ Թուրքիոյ մէջ: Ի հարկէ մահմետականացուած հայեր կան, բայց մշակոյթը կը փոխէ ամէն ինչ: Միջոց պէտք է գտնենք, որ նորէն արդարութեան եւ խաղաղութեան մէջ միասնաբար ապրինք` հայ, թուրք, քիւրտ: Ես կը հասկնամ, որ այս մէկը դեռ երազ է, եւ այդքան ալ մօտ ապագային կարելի չէ իրականացնել», յայտնեց Փայլան:

Անդրադառնալով մայրենի լեզուի իր իմացութեան` ան նշեց, որ իր տատիկները գերազանց կը տիրապետէին հայերէնին, սակայն ծնողները` ոչ այդքան, իսկ ինքը հայերէնի առաջին տառերուն ծանօթացած է մանկապարտէզի մէջ:

Հաղորդենք, որ ուսանողներուն հարցումներուն պատասխանելէ ետք Կարօ Փայլան Երեւանի պետական համալսարանի կողմէ պարգեւատրուեցաւ ոսկիէ մետալով եւ Շմաւոն Շմաւոնեանի «Արարատ» ալպոմով: «Շնորհակալ եմ եւ` հպարտ», հաստատեց Կարօ Փայլան:

LEAVE A REPLY

Please enter your comment!
Please enter your name here