Միացեալ Նահանգներ Եւ Թուրքիա Կը Դադրեցնեն Երկկողմանի Անցագիրներու Տրամադրումը

0
168

Երբ Կիրակի 8 Հոկտեմբերին, Թուրքիոյ մէջ Ամերիկային Միացեալ Նահանգներու դեսպանատունը դադրեցուցած է անցագիրներու (վիզա) տրամադրումը Թուրքիոյ քաղաքացիներուն, պաշտօնական Անգարան դիմած է պատասխան գործողութիւններու:

Ըստ «Էրմէնիհապեր»-ի՝ յղում ընելով թրքական «Hurriyet» թերթի կայքին` յայտնի դարձած է, որ Թուրքիոյ դեսպանատունը նոյնպէս դադրեցուցած է վիզաներ տրամադրել ամերիկացիներուն: Այդ մասին յայտարարութիւն տարածած է Թուրքիոյ մէջ ԱՄՆ-ի դեսպանատունը «Twitter»-ի իր էջին մէջ:

Աղբիւրը կը շեշտէ, որ փոխադարձ անցագիրներ չտրամադրելու խնդիրը ծագեցաւ, երբ Սթամպուլ գտնուող ԱՄՆ-ի հիւպատոսարանի աշխատակից Մեհմեթ Թօփուզը լրտեսութեան եւ կիւլենական համայնքի հետ կապ ունենալու մեղադրանքներով կալանաւորուեցաւ: Ամերիկեան կողմը անհիմն կը համարէ այդ մեղադրանքները:

Թօփուզի կալանաւորումէն ետք ԱՄՆ-ի դեսպանատունը տարածեց յայտարարութիւն մը, ուր մասնաւորապէս ըսուած էր. «Վերջին իրադարձութիւնները ստիպած են ԱՄՆ-ի կառավարութեան վերագնահատելու ԱՄՆ-ի դիւանագիտական առաքելութեան եւ անձնակազմի նկատմամբ Թուրքիոյ կառավարութեան վերաբերմունքը: Այդ վերագնահատման ընթացքին մեր դեսպանատուն եւ հիւպատոսութիւններ այցելողներուն թիւը կրճատելու նպատակով մենք դադրեցուցած ենք բոլոր ոչ ներգաղթային վիզաներու տրամադրումը Թուրքիոյ մէջ գտնուող ԱՄՆ-ի բոլոր դիւանագիտական հաստատութիւններուն մէջ»:

Թուրքական աղբիւրի տեղեկութիւններով` վերոնշեալ խնդիրը Հոկտեմբեր 8-ին Արտաքին գործոց նախարար Մեւլութ Չաւուշօղլուն՝ կայացած հեռախօսազրոյցի ժամանակ՝ քննարկած է ԱՄՆ-ի  արտաքին գործոց նախարար Ռեքս Թիլլըրսոնի հետ:

LEAVE A REPLY

Please enter your comment!
Please enter your name here