Սուրիոյ Մէջ Հայաստանի Դեսպանը Հանդիպում Ունեցաւ Հալէպի Հայ Համայնքի Ներկայացուցիչներուն Հետ

0
144

Սուրիոյ մէջ ՀՀ դեսպան Արշակ Փօլատեան, 4-7 Հոկտեմբերին այցելեց Հալէպ, ուր ծանօթացաւ շուրջ քառամեայ պաշարումէ ետք ազատագրուած Հալէպի կրած վնասներուն եւ քաղաքի վերականգնման ուղղուած ջանքերուն, տեղւոյ վրայ ուսումնասիրեց հալէպահայութեան արդի խնդիրները, համայնքային իշխանութիւններու հետ քննարկեց այդ խնդիրներու լուծման հնարաւորութիւնները, ինչպէս նաեւ հանդիպումներ ունեցաւ Հալէպի նահանգային իշխանութիւններու հետ: Այս մասին կը տեղեկացնէ ՀՀ արտաքին գործոց նախարարութեան մամուլի, տեղեկատուութեան եւ հասարակայնութեան հետ կապի վարչութիւնը:

4 Հոկտեմբերին Արշակ Փօլատեան այցելեց Հալէպի մէջ ՀՀ գլխաւոր հիւպատոսութիւն, ուր նորանշանակ գլխաւոր հիւպատոս Արմէն Սարգսեան դեսպանին ներկայացուց հիւպատոսութեան գործունէութեան հիմնական ուղղութիւնները: Քննարկուեցան հալէպահայ համայնքի եւ Հալէպի նահանգային իշխանութիւներու հետ համագործակցութեան խորացման հնարաւորութիւնները: Հանդիպումէ ետք դեսպան Փօլատեան գլխաւոր հիւպատոսի ուղեկցութեամբ այցելեց հիւպատոսութեան հիմնական շէնք եւ ծանօթացաւ շէնքի ընդհանուր վիճակին` ուսումնասիրելով հիւպատոսութեան աշխատանքները հիմնական շէնքին մէջ վերսկսելու հնարաւորութիւնը (2012-ին զինեալներու յարձակման պատճառով հիւպատոսութիւնը տեղափոխուած է աւելի ապահով հայաբնակ թաղամաս):

5 Հոկտեմբերին դեսպան Փօլատեան հանդիպեցաւ Հալէպի նահանգապետ Հուսէյն Տիապի հետ։

5 Հոկտեմբերի երեկոյեան, Հալէպ ժամանած ՀՀ Սուրիոյ դեսպան դոկտ. Արշակ Փօլատեան Ս. Աստուածածին եկեղեցւոյ ներքնասրահին մէջ հանդիպում ունեցաւ Հալէպի հայ համայնքի ներկայացուցիչներուն հետ։

Հանդիպումը կազմակերպուած էր ՀՀ Հալէպի Գլխաւոր Հիւպատոսութեան եւ Բերիոյ Թեմի Ազգ. Առաջնորդարանին կողմէ։

Հանդիպման ներկայ էին համայնքապետները, Սուրիոյ խորհրդարանի երեսփոխանը, հալէպահայ կազմակերպութիւններու, Ազգ. Իշխանութեան, մշակութային, բարեսիրական, մարզական միութիւններու ներկայացուցիչներն ու քահանայից դասը։

Բացման խօսքով Մարինէ Տարագճեան լուսարձակի տակ առաւ Հալէպի ներկայ վիճակն ու վերականգնումի աշխատանքները, ապա ներկայացուց սուրիական ճգնաժամին տեւողութեան Հայաստանի մօտեցումներն ու Սուրիոյ ժողովուրդին ուղարկած մարդասիրական հանգրուանային օգնութիւնները։

Այնուհետեւ դեսպան Արշակ Փօլատեան նախ խոր կսկիծով անդրադարձաւ Հալէպի աւերակներուն ու կորուստներուն, դիտել տալով որ Հալէպի աղէտը համեմատելի չէ Դամասկոսի կամ այլ նահանգներու կրած վնասներուն հետ։ Դեսպանը վեր առնելով հալէպահայութեան դիմադրողսկան ոգին եւ մաքառումը յայտնեց, որ ՀՀ նախագահն ու կառավարութիւնը տագնապի առաջին իսկ օրէն թելադրեցին պահել Սուրիոյ մէջ ՀՀ դիւանագիտական ներկայացուցչութիւնը եւ իրենց կարելին ընել՝ սատար հանդիսանալու Սուրիոյ ժողովուրդին ու հայ համայնքին։

Դեսպանը լուսարձակի տակ առաւ Թուրքիոյ էական դերը սուրիական ճգնաժամի հրահրման մէջ, յատկապէս յիշելով 21 Սեպտեմբեր 2014-ին, Հանաստանի անկախութեան օրը, Տէր Զօրի Յուշահամալիրին պայթումը եւ Հալէպի հայաշատ թաղերուն հրթիռակոծումը։ Անդրադառնալով Հայաստանի մօտեցումին, դեսպանը դիտել տուաւ որ Հայաստան երկու ուղղութեամբ գործեց․ նախ իր քաղաքական յստակ դիրքորոշումով հայկական եւ միջազգային բեմերէ դատապարտեց Սուրիա արտածուած ահաբեկչական շարժումը, որ մարդկային բազում զոհեր խլեց, քաղաքակրթութիւն քանդեց, Հայաստան միաժամանակ, իր կարելիութեան սահմաններուն համապատասխան, մարդասիրական օժանդակութիւններ առաքեց Սուրիոյ ժողովուրդին ու հայ համայնքին։ Հայաստան միակ երկիրն էր, որ բաց պահեց Սուրիոյ մէջ իր դիւանագիտական գրասենեակները երկու պատճառներով՝ նախ առ ի երախտագիտութիւն Սուրիոյ ասպնջական ժողովուրդին՝ Օսմանեան կայսրութեան արհաւիրքէն ու Հայոց Ցեղասպանութենէն ճողոպրած հայութեան ձեռք երկարելուն համար, ապա նաեւ տեղւոյն հայ համայնքին նեցուկ կանգնելու համար։

Փօլատեան ըսաւ․ «Մենք գիտենք որ սուրիահայութիւնը կառչած է զինք ծնունդ տուող ու զօրավիգ կանգնող այս հողին. հայութիւնը վերջապէս Միջին Արեւելքի մէջ պատմական ներկայութիւն ունի։ Այդ իսկ պատճառով սուրիահայութեան վերականգնումը միայն Սուրիոյ հայութեան հարցը չէ, համազգային հարց է։ Պարտադրաբար, պայմաններու բերումով երկրէն մեկնողներուն, սակայն, կը յորդորենք ուղղուիլ Հայաստան, յաղթահարել այնտեղ յառաջացող դժուարութիւնները, որոնք առկայ են նաեւ այլ երկիրներու մէջ, որովհետեւ արեւմտեան երկիրներու մէջ ուծացումը անխուսափելի է»։

Այնուհետեւ դեսպան Փօլատեան հալէպահայութեան ներկայացուց ՀՀ Հալէպի նորանշանակ Գլխաւոր Հիւպատոս Արմէն Սարգիսեանը։

Գլխաւոր Հիւպատոսը խօսք առնելով պատրաստակամութիւն յայտնեց շարունակելու ՀՀ դիւանագէտներուն աւանդոյթները։

Աւարտին Բերիոյ Հայոց Թեմի Առաջնորդ Գերշ․ Տէր Շահան Սրբ․ Արք․ Սարգիսեան նախ բարի գալուստ մաղթեց դեսպան Փօլատեանին եւ գլխաւոր հիւպատոս Արմէն Սարգիսեանին, ապա իր երախտագիտութիւնը յայտնեց Հայաստանի դիւանագիտական ներկայացուցիչներուն՝ դիտել տալով որ Հայաստան-Սփիւռք համաժողովին արտակարգ իրավիճակներու մէջ յայտնուած համայնքներու իրավիճակին յատուկ նիստ յատկացնելը առիթ հանդիսացաւ մեր համայնքին դժուարութիւնները քննարկելու, ապա նաեւ կողմնակի հանդիպումներով Սփիւռքի Նախարարութեան ներկայացուցիչներուն հետ խօսելու գործակցութեան եզրերու շուրջ։

Այնուհետեւ սրբազան հայրը, յանուն Բերիոյ Թեմի Ազգ․ Իշխանութեան, Բերիոյ Թեմի «Ծառայութեան Շքանշան»ով պարգեւատրեց ՀՀ Սուրիոյ դեսպան Փրօֆ. Արշակ Փօլատեանը։

LEAVE A REPLY

Please enter your comment!
Please enter your name here