Իրաք Դէպի Թուրքիա Քարիւղի Արտածման Նոր Ուղի Կը Փնտռէ

0
133

ՊԱՂՏԱՏ.- Հիւսիսային Իրաքի Քրտական ինքնավար մարզի անկախութեան հանրաքուէէն ետք, Իրաքի Կեդրոնական իշխանութիւնները զանազան սահմանափակումներ կը կիրարկեն Քիւրտիստանի դէմ։ Նոյն նպատակով փորձեր կը կատարուին այլընտրանք գտնելու համար Իրաքի քրտական տարածքներէն դէպի Թուրքիա երկարող քարիւղատարին համար։

«Սէօզճիւ» կը գրէ, որ այժմ օրակարգի վրայ է հին քարիւղատարը նորոգելու նախագիծը։

Իրաքի քարիւղի նախարար Ճապպար Ալի Լայիպի պահանջած է կարելի եղածին չափ շուտ վերսկսիլ Իրաքի Քերքուք նահանգէն դէպի թրքական Ճէյհան նաւահանգիստ քարիւղի արտածման աշխատանքներուն։

Ռուսական «ՌԻԱ Նովոսթի» լրատու գործակալութիւնը իր կարգին կը գրէ, թէ իրաքցի նախարարը հանդիպում ունեցած է Պաղտատի մօտ Թուրքիոյ դեսպանին հետ եւ քննարկած է իրաքեան քարիւղը Ճէյհանէն արտածելու հարցը: Լայիպի մասնաւորաբար շեշտած է Քերքուքէն՝ Իրաքի Սալահետտին եւ Նինուէ նահանգներու ճամբով Թուրքիա հասնող քարիւղի մատակարարման հոլովոյթը վերականգնելու ջանքերը արագացնելու անհրաժեշտութիւնը:

Քարիւղի նախարարութեան ներկայացուցիչ Իսամ Ճիհատ նաեւ նշած է, որ քարիւղի վերամշակումով ու մատակարարումով զբաղող ընկերութիւններու աշխատանքներուն վերսկսման մասին ցուցմունքը տրուած է՝ նշեալ նահանգները «Իսլամական պետութեան» ճիրաններէն ազատագրելէ ետք:

Նշենք, որ Քերքուքը Պաղտատի եւ Իրաքի քրտական ինքնավար մարզին միջեւ վիճելի տարածք մըն է:

 

LEAVE A REPLY

Please enter your comment!
Please enter your name here