Ատրպէյճանցիներ Գողութիւն Կատարած Են Ֆրանքֆուրթի Գիրքի Տօնավաճառին Մէջ Հայաստանի Տաղաւարէն

0
141

ԵՐԵՒԱՆ.- Գերմանիոյ Ֆրանքֆուրթ քաղաքի գիրքի յայտնի տօնավաճառին ընթացքին, ատրպէյճանցիներ Հայաստանի տաղաւար մուտք գործելով՝ փորձած են գողութիւն ընել: Այս մասին կը տեղեկացնէ Հայաստանի Հանրապետութեան մշակոյթի նախարարի տեղակալ Ներսէս Տէր Վարդանեան՝ նշելով, որ 12  Հոկտեմբերին, այդ տօնավաճառին ըն-թացքին Հայաստանի տաղաւար մտած են երկու ատրպէյճանցիներ, վերցուցած են գրասեղանին վրայ ծալուած վիճակով դրուած Հայաստանի եւ Արցախի քանի մը քարտէսներ, ապա Արցախի թեմային շուրջ քաղաքական վանկարկումներ կատարելով տարած են իրենց հետ:

«Մենք կարգի հրաւիրելու պահանջով հետեւեցանք այս երկուքին, մինչեւ Ատրպէյճանի տաղաւար, ապա իրենց տաղաւարին մէջ ես արդէն ուժով ետ վերցուցի քարտէսները ու վերադարձայ: Անմիջապէս տաղաւար կանչեցի ցուցահանդէսի անվտանգութեան աշխատակիցները եւ ոստիկանութիւնը, նաեւ՝ ցուցահանդէսի փոխտնօրէն Թոպիաս Վոսը եւ այլ պատասխանատուներ: Ոստիկանութիւնը այս բոլորը արձանագրեց եւ խոստացաւ հարկ եղած միջոցներու ձեռնարկել», յայտնած է Տէր Վարդանեան՝ նշելով, որ այս ամէնը լրատուամիջոցներու կողմէ տեսագրուած է եւ յառաջիկային պիտի հրապարակուի:

13 Հոկտեմբերին տրուած իրենց լրատուութիւններուն մէջ, ատրպէյճանցիները գրած են, թէ իրենք մտած են «անջատողականներ»ու տաղաւար եւ քարտէսներ պատռած են:

«Ծանօթ ձեռագիր է: Փաստօրէն, այս ամէնը կը կատարուի իրենց մամուլին համար. եւ այս մէկը կը կատարուի երկրի մը կողմէ, որուն տաղաւարին մէջ քաղաքականութիւնն ու քարոզչութիւնը կը գերակշռեն գրականութիւնն ու մշակոյթը», նշած է Հայաստանի մշակոյթի փոխնախարարը:

LEAVE A REPLY

Please enter your comment!
Please enter your name here