Հայաստանի Հանրապետութիւն – Եւրոպական Միութիւն Համաձայնագիրի Նախագիծը Հրապարակուեցաւ

0
132

Եւրոպական յանձնաժողովը հրապարակած է Հայաստանի հետ Համապարփակ եւ ընդլայնուած գործընկերութեան համաձայնագիրի բնագիրը: Փաստաթուղթը բաղկացած է 357 էջերէ:

Համաձայնագիրի նախաբանին մէջ անդրադարձ կայ ղարաբաղեան տագնապին: Անոր մէջ նշուած է, որ նկատի կ՛առնուի ղարաբաղեան տագնապի խաղաղ եւ տեւական լուծման Հայաստանի Հանրապետութեան հաւատարմութեան կարեւորութիւնը եւ ԵԱՀԿ-ի Մինսքի խմբակի համանախագահներուն միջոցով բանակցութիւններու շրջագիծին մէջ ըստ կարելւոյն շուտ լուծման հասնելու անհրաժեշտութիւնը:

Փաստաթուղթին մէջ նշուած է, որ անհրաժեշտ է խաղաղ լուծման հասնիլ ՄԱԿ-ի ուխտի սկզբունքներուն, ԵԱՀԿ-ի Հելսինքիի եզրափակիչ փաստաթուղթին` յատկապէս ուժի կիրարկումէն կամ ուժի կիրարկման սպառնալիքէն զերծ մնալու, պետութիւններու տարածքային ամբողջականութեան եւ ժողովուրդներու ինքնորոշման հաւասար իրաւունքներու հիման վրայ:

Փաստաթուղթի 2-րդ գլուխը կը վերաբերի ուժանիւթի մարզին: 42-րդ յօդուածին մէջ նշուած է, որ հիւլէական ուժանիւթի մարզին մէջ համագործակցութիւնը կը ներառէ արհեստագիտութիւններու, փորձի փոխանակում եւ վարժանքներու իրականացում անվտանգութեան եւ թափօններու կառավարման մարզերուն մէջ, որպէսզի ապահովուի ատոմակայանի անվտանգ շահագործումը:

Ուժանիւթի մարզին մէջ համագործակցութիւնը կ՛ենթադրէ նաեւ Մեծամօրի ատոմակայանի փակում եւ անոր փոխարինում Հայաստանի Հանրապետութեան ուժանիւթի անվտանգութեան ապահովման համար անհրաժեշտ նոր հզօրութեամբ:

Տնտեսական համագործակցութեան մասին գլուխին մէջ նշուած է, որ Հայաստանը պէտք է քայլերու ձեռնարկէ իր տնտեսական եւ ֆինանսական կարգաւորումներն ու քաղաքականութիւնը աստիճանաբար Եւրոպական Միութեան կարգաւորումներուն մօտեցնելու համար, իսկ Եւրոպական Միութիւնը պիտի աջակցի Հայաստանին յուսալի մաքրոտնտեսական քաղաքականութեան հարցով:

Հայաստանի Հանրապետութիւն-Եւրոպական Միութիւն փաստաթուղթի 15-րդ յօդուածը կը վերաբերի շարժունակութեան: Նշուած է, որ կողմերը պարտաւոր են կատարելու Եւրոպական Միութեան եւ Հայաստանի Հանրապետութեան միջեւ ստորագրուած արտայանձնման եւ մուտքի արտօնագիրներու դիւրացման համաձայնագիրները, որոնք ուժի մէջ մտած են 1 յունուար 2014-էն: Նշուած է, որ կողմերը երկխօսութեան պիտի սկսին մուտքի արտօնագիրի ազատականացման շուրջ:

LEAVE A REPLY

Please enter your comment!
Please enter your name here