Մեր Համայնքէն Խլած Էք Ընտրութիւններ Կատարելու Իրաւունքը. Փայլան

0
266

ԵՐԵՒԱՆ, «Էրմենիհապեր».- Թուրքիոյ խորհրդարանի պոլսահայ պատգամաւոր Կարօ Փայլան, Հոկտեմբեր 16ին, խորհրդարանին մէջ բարձրացուց Պոլսոյ հայոց պատրիարքի եւ հայկական հիմնարկներուն մէջ այլ ընտրութեանց դիմագրաւած դժուարութիւններուն հարցը:

Հիմնարկներուն վերաբերեալ նոր օրէնսդրական կարգաւորումները քննարկելու ընթացքին, Փայլան յայտարարեց, որ հայ համայնքի հիմնարկները 5 տարիէ ի վեր զրկուած են ընտրութիւններ կատարելու իրաւունքէն: «5 տարի առաջ մեզմէ խլած էք ընտրելու մեր իրաւունքը. համայնքի հիմնարկները չեն կրնար ընտրութիւններ կատարել: Նաեւ, 8 տարի է, որ մեր պատրիա՛րքն իսկ չենք կրնար ընտրել»:

Փայլան նաեւ անդրադարձաւ Թուրքիոյ տարածքին գտնուող հայկական եւ յունական լքեալ եկեղեցիներու հարցին՝ նշելով, որ Թուրքիոյ արեւելքը գտնուած է մօտաւորապէս 6000 եկեղեցի, որոնցմէ միայն 80-90-ը ոտքի մնացած է, ապա աւելցուցած է, որ եթէ 10 տարի եւս այդ կառոյցները պահպանելու համար միջամտութիւն չկատարուի, ապա անոնցմէ ոչինչ պիտի մնայ: Ըստ պոլսահայ պատգամաւորին՝ 6000 եկեղեցիներէն 4000-ը արձանագրուած է անհատներու անունով:

«Ձեզի կրնամ ցոյց տալ յայտարարութիւններ, ուր կ՛ըսուի. «Ծախու է եկեղեցի մը»: Կարելի՞ է արդեօք յայտարարել՝ «Ծախու է մզկիթ մը»: Այս տեսանկիւնէն՝ մեր համատեղ պատմութեան, բոլորի՛ն պատմութեան, բոլոր ժողովուրդներու պատմութեան տէր կանգող պետական քաղաքականութի՛ւն անհրաժեշտ է», եզրակացուցած է Փայլան:

Միւս կողմէ, պատրիարքական աթոռի տեղապահ Գարեգին արք. Պէքճեան, իր «Ֆէյսպուք»ի էջին վրայ թրքերէնով «Լուսաբանութիւն» մը գրած է՝ քննադատելով Ս. Փրկիչ հիւանդանոցի հոգաբարձութեան ատենապետ Պետրոս Շիրինօղլուն, որ «Ակօս» ու «Ժամանակ» թերթերուն հետ կատարուած հարցազրոյցներու ընթացքին ըսած էր, թէ պետութիւնը չի՛ ճանչնար Պէքճեանին եւ ընտրութեան նախաձեռնարկ մարմինին օրինականութիւնը։

Լուսաբանութեան վերջաւորութեան, Պէքճեան սրբազան կը յիշեցնէ, որ շուտով Գերմանիա պիտի երթայ՝ վեհափառ հայրապետին այցելութեան համար, ապա պիտի վերադառնայ ու պիտի շարունակէ յառաջ տանիլ տեղապահի պաշտօնը։

Իր կարգին, Պոլսոյ պատրիարքարանի Կրօնական ժողովի ատենապետ Սահակ եպիսկոպոս Մաշալեան յայտնած է, որ չի գիտեր, թէ ինչո՛ւ Պոլսոյ նահանգապետարանը չէ պատասխանած ընտրութեան կապակցութեամբ կատարուած դիմումին։

Յիշեցնենք, որ Յուլիսի սկիզբը, նախաձեռնարկ մարմինը Պոլսոյ նահանգապետարան ուղարկուած դիմումով մը ներքին գործոց նախարարութիւնը տեղեակ պահած էր թէ՛ նախաձեռնարկ մարմինին կազմին եւ թէ ընտրութիւններու նախատեսուած օրուան մասին։ Ընտրական գործընթացի յառաջխաղացման համար անհրաժեշտ է, որ նախարարութիւնը պատասխանէ պատրիարքութեան նամակին եւ արտօնէ ընտրութիւնը: Սակայն, ինչպէս յայտնի է, ցայժմ պատասխան չէ ստացուած:

Մաշալեան նաեւ նշած է, որ այս պարագային՝ տեղապահ ընտրուած Գարեգին արք. Պեքճեան պէտք է պարզապէս լքէ իր աթոռը: «Եթէ ընտրութիւնը միայն եկեղեցականներու միջեւ ըլլար, ապա խնդիր չէինք ունենար, բայց քանի որ ժողովուրդն ալ կը մասնակցի, ուրեմն ստիպուած ենք պետութեան պատասխանին սպասելու», աւելցուցած է ան:

LEAVE A REPLY

Please enter your comment!
Please enter your name here