Եւրոպահայերու 4-րդ Համագումարին Ընթացքին Կայացած Է Հայոց Ցեղասպանութեան Ճանաչման Ու Հատուցման Նուիրուած Քննարկում

0
120

 Չորեքշաբթի, 18 Հոկտեմբերին Պրիւքսէլի Հայ տան մէջ մեկնարկած Եւրոպահայերու 4-րդ համագումարի առաջին օրուան աշխատանքները եզրափակուեցան «Ցեղասպանութեան ճանաչում եւ հատուցում» խորագիրով կլոր սեղանով, որուն զրուցավարն էր Արդարութեան եւ մարդու իրաւունքի հայկական իրաւաբանական կեդրոնի տնօրէններու խորհուրդի անդամ Գէորգ Յակոբճեան:

«Հայերն այսօր»-ը յղում կատարելով Լիբանանի «Ազդակ» օրաթերթին, կը յայտնէ, որ  Միջազգային իրաւունքի փորձագէտ Վլատիմիր Վարդանեան իր ելոյթին մէջ յայտնեց, որ փոխհատուցումը շատ կարեւոր է Հայոց ցեղասպանութեան իրաւական թղթածրարին համար: Ան ըսաւ, որ Ցեղասպանութիւնը այն եզակի յանցագործութիւններէն է, որ ուղղուած է մարդկային ինքնութեան դէմ` աւելցնելով, որ Ցեղասպանութեան մեծագոյն փաստը տարածքային կորուստ չէր, այլ` ինքնութեան կորուստը:

Ան յայտնեց, որ անմիջական հետեւանքներու վերացումը պայմանաւորուած է միջպետական հարցեր ներկայացնելու մեքանիզմներու հետ, որոնց շարքին չկայ այնպիսին, որուն դիմելով կրնանք անմիջականօրէն ստանալ մեր իրաւունքները: Վարդանեան ընդգծեց, որ իրաւական միջոցները անհրաժեշտ են եւ չունին այլընտրանք, սակայն այդտեղ յաջողութեան հասնելու համար պէտք է ունենալ բարոյահոգեբանական բարենպաստ վիճակ:

Օրուան վերջին զեկուցաբեր, Պոխումի «Ռուր» համալսարանի դասախօս փրոֆ. Միհրան Տապաղ յայտնեց, որ սփիւռքը իրականութիւն մըն է, որ պիտի շարունակէ մնալ, ուստի կը պահանջէ մասնաւոր հետաքրքրութիւն եւ խնամք: Ան ըսաւ, որ լեզուն եւ աւանդութիւնը միշտ փոփոխութիւններու կ՛ենթարկուին եւ կորուստի վտանգ կը դիմագրաւեն, իսկ այն ինչ որ մեր պատկանելիութիւնը կ՛ապահովէ յիշողութիւնն է: Տապաղ յայտնեց, որ մենք քաղաքականացած մօտեցումէն անդին պէտք է մեր կորուստին հանդէպ զարգացնենք ինքնութեան պատում մը` հիմնուած յիշողութեան վրայ:

Նշենք, որ այսօր Եւրոպական խորհրդարանին մէջ տեղի կ՛ունենայ եւրոպահայութեան 4-րդ համագումարի 2-րդ ու վերջին նիստը:

 

LEAVE A REPLY

Please enter your comment!
Please enter your name here