Ծիծեռնակաբերդ Այցելած Թուրք Հասարակական Գործիչ Քաւալա Կը Ձերբակալուի

0
133

ՊՈԼԻՍ, «Մարմարա».- Հինգշաբթի,  19 Հոկտեմբերի առաւօտեան կանուխ ժամերուն հաղորդուեցաւ, որ Պոլսոյ օդակայանին մէջ հսկողութեան տակ առնուած է գործարար, հասարակական գործիչ, «Անատոլու Քիւլթիւր» հիմնարկի նախագահ եւ «Իլեթիշիմ» հրատարակչատան սեփականատէրերէն Օսման Քաւալա։ Ան Այնթապ մեկնած էր՝ «Կէօթէ» հիմնարկին հետ միասին ծրագիր մը իրականացնելու նպատակով, ու անկէ կը վերադառնար, երբ ոստիկաններ օդանաւ խուժած են ու ձերբակալած զինք։

Քաւալա անմիջապէս տարուած է ոստիկանատուն, ուր յայտարարուած է, թէ եօթնօրեայ կալանքի վճիռ արձակուած է անոր դէմ։

Քաւալայի փաստաբանը՝ Էրաթ Չաղըլ, խօսելով ձերբակալութեան մասին՝ ըսած է, թէ հետաքննութեան մէջ գաղտնիութեան որոշում կը կիրարկուի, ուստի ինք չէ կրցած տեղեակ ըլլալ, թէ ի՛նչ մեղադրանքներ կան Քաւալայի դէմ։

Եւրոպական խորհրդարանին մէջ Թուրքիոյ մասին զեկուցող Քաթի Փիրի անմիջապէս արձագանգ հանդիսացաւ Քաւալայի ձերբակալութեան ու նշեց, թէ այս ձերբակալութիւնը յոյժ մտահոգիչ է։ Ան աւելցուց, թէ շուտով պիտի առաջարկէ, որ Եւրոպական խորհրդարանը կոչ ուղղէ Թուրքիոյ իշխանութիւններուն՝ պահանջելով Օսման Քաւալայի ազատ արձակումը։

Օսման Քաւալա ծնած է 1957-ին, Փարիզ։ Ան շրջանաւարտ եղած է «Ռոպեր»չ քոլեճէն եւ ուսումը շարունակած է Մանչեսթըրի համալսարանին մէջ։ Հասարակական բազմաթիւ կազմակերպութիւններու վարչութեան անդամ է եւ Մուրատ Պելկէի հետ հիմնած է Թուրքիոյ ամէնէն մեծ հրատարակչատուներէն մէկը՝ «Իլեթիշիմ»ը։

Կը պնդուի, որ Քաւալա կապեր ունի ամերիկացի միլիառատէր Ճորճ Սորոսի հետ, որուն հիմնարկները Թուրքիոյ մէջ եւս գործունէութիւն կը տանին։

Քաւալա միշտ պատրաստակամութիւն ցոյց տուած է զօրակցելու Պոլսոյ հայ համայնքի մշակութային ջանքերուն եւ յաճախ համայնքին տրամադրութեան տակ դրած է Կալաթասարայի մէջ գտնուող իր «Ճեզայիր» հանդիսասրահը։ Ան յայտնի է իր հայամէտ գործունէութեամբ եւ Հրանդ Տինքի ընտանիքին մտերիմներէն է, որ աշխուժօրէն կը պայքարի Տինքի սպանութեան գործով արդար դատավարութիւն իրականացնելու ջանքերուն համար:

 24  Ապրիլի 2016-ին , Քաւալա այցելած է Հայոց Ցեղասպանութեան Ծիծեռնակաբերդ յուշարձանը եւ յարգանքի տուրք մատուցած զոհերու յիշատակին, իսկ 2013-ին մասնակցած էր ամերիկահայ վիպագիր Քրիս Պոհճալեանի «Աւազէ Ամրոցի Աղջիկները» հատորին՝ Պոլսոյ մէջ տեղի ունեցած ներկայացման, որ իրականացած էր Քաւալայի պատկանող «Անատոլու Քիւլթիւր» կեդրոնին նախաձեռնութեամբ։

LEAVE A REPLY

Please enter your comment!
Please enter your name here