Սեֆիլեանի Դատավարութեան Նիստը Անցաւ Լարուած Մթնոլորտի Մէջ

0
135

ԵՐԵՒԱՆ, «Ազատութիւն».- Լրագրող Նաիրա Բուլղադարեան կը հաղորդէ, որ ընդդիմադիր գործիչ Ժիրայր Սեֆիլեանի եւ միւսն գործիչներուն գործով, Ուրբաթ օրուան դատական նիստը անցած է լարուած մթնոլորտի մէջ: Պաշտպան փաստաբանները փորձած են դատաւորին համոզել, որ ամբաստանեալ Ներսէս Պօղոսեան, որ 22 օրէ ի վեր հացադուլի մէջ է, ի վիճակի չէ նիստին մասնակցելու:

Պօղոսեան երեք շաբաթ առաջ դատարանին մէջ յայտարարած էր, որ հացադուլի կը սկսի՝ դատաւոր Տաթեւիկ Գրիգորեանին ներկայացնելով երեք պահանջ՝ թոյլատրել դատական նիստերու տեսանկարահանումը, դատարանին մէջ իրեն «արա»ով դիմած մեղադրող դատախազ Պետրոս Պետրոսեանը հեռացնել գործի քննութենէն եւ զինք ազատել կալանքէ: Դատաւորը շարունակաբար մերժած է ամբաստանեալի պահանջները:

Ուրբաթ օրուան դատական նիստին Պօղոսեանի պաշտպան Արայիկ Պապիկեան յայտարարած է, որ հացադուլի մէջ գտնուող իր պաշտպանեալի ինքնազգացողութիւնը վատացած է, իսկ «Նուբարաշէն» բանտի ղեկավարութիւնը զայն դատարան ուղարկելէ առաջ բժշկական քննութեան չէ ենթարկած: Դատաւոր Տաթեւիկ Գրիգորեան որոշած է շտապօգնութեան բուժանձնակազմ հրաւիրել՝ նիստը շարունակելու նպատակայարմարութիւնը որոշելու համար:

Հացադուլի մէջ գտնուող ամբաստանեալը իբրեւ բողոքի նշան հրաժարած է բժշկական օգնութիւն ստանալէ:

Դատաւորը, առ այդ, որոշած է շարունակել դատական նիստը:

Տեսնելով, որ դատաւոր Տաթեւիկ Գորիգորեան անդրդուելի է, Ժիրայր Սեֆիլեան յայտարարած է, որ չի կրնար մասնակցիլ Ներսէս Պօղոսեանի «խոշտանգման արարողութեան»: Ապա նման յայտարարութիւններ կատարած են փաստաբաններ Տիգրան Հայրապետեան, Արայիկ Պապիկեան եւ Նինա Կարապետեանց, լքելով դատարանի դահլիճը:

LEAVE A REPLY

Please enter your comment!
Please enter your name here