35 Տարի Ետք Վճիռը Արձակուեցաւ . Պաշիր Ժեմայէլը Սպաննողները Դատապարտուեցան Մահապատիժի

0
137

Հանրապետութեան նախկին նախագահ Պաշիր Ժեմայէլի սպանութեան գծով դատավարութեան աւարտէն ետք Արդարութեան խորհուրդը երէկ արձակեց իր վճիռը Ժեմայէլը սպաննողներուն դէմ:

35 տարի ուշացած այս վճիռը երէկ դատարանին մէջ հնչեց` մահապատիժի դատապարտելով եւ քաղաքացիական իրենց իրաւունքներէն զրկելով Հապիպ Շարթունին եւ Նեպիլ Ալամը:

Սակայն Արդարութեան խորհուրդին կողմէ այս վճիռը արձակուեցաւ յանցագործներուն բացակայութեան:

Վճիռին արձակումէն ետք, նախկին Առաջին տիկին Սոլանժ Ժեմայէլ յայտնեց, որ իրենք մնայուն կերպով հետապնդած են Պաշիրի սպանութեան դատը` աւելցնելով, որ այսօր 14 սեպտեմբերի բոլոր նահատակները ստացած են իրենց իրաւունքը: «Մենք այսօր կը զգանք, որ դատական իշխանութիւնները լիբանանեան պետութեան եւ անոր հաստատութիւններուն վերադարձուցած են անոր հեղինակութիւնը եւ յոյս ներշնչած` նահատակներուն արդարութիւն բերելու իմաստով», ըսաւ ան:

Սոլանժ Ժեմայէլ շեշտեց, որ դատական իշխանութիւնները այդ վճիռը արձակեցին լիբանանցիներուն անունով: Ան շնորհակալութիւն յայտնեց բոլոր անոնց, որոնք զօրակցեցան Ժեմայէլ ընտանիքին` հաստատելով, որ իրենք պիտի շարունակեն Պաշիրի ուղեգիծով ընթանալ` իրականացնելու համար ազատ, անկախ եւ գերիշխան Լիբանան մը կերտելու անոր երազը:

Ապա Պաշիրի զաւակը` Փաղանգաւոր կուսակցութեան երեսփոխան Նետիմ Ժեմայէլ յայտնեց, որ իրենք պիտի ուղղուին Սեսին հրապարակ` տօնելու համար իրաւունքի եւ արդարութեան արձանագրած յաղթանակը, ուրկէ պիտի ուղղուին Պիքֆայա` վճիռը զետեղելու համար Պաշիրի շիրիմին:

Նշենք, որ վճիռի արձակումին ընթացքին Ղովմի կուսակցութեան անդամներ խմբուեցան Արդարութեան պալատին կից եւ զօրակցական կանչեր արձակեցին ի նպաստ Հապիպ Շարթունիի: Անոնք փակեցին Սամի Սոլհ հրապարակը, այդ պատճառով ալ բանակայիններ եւ ապահովութեան ուժեր որդեգրեցին ապահովական միջոցառումներ` հակակշիռի տակ առնելու համար տիրող կացութիւնը:

Սեսինի Մէջ` Իրաւունքի Եւ Արդարութեան Յաղթանակի Տօնակատարութիւն

Ինչպէս երեսփոխան Նետիմ Ժեմայէլ յայտարարած էր, վճիռը արձակուելէն անմիջապէս ետք Պաշիր Ժեմայէլի ընտանիքին անդամներն ու հարազատները, ինչպէս նաեւ Փաղանգաւոր կուսակցութեան մեծ թիւով անդամներ, համակիրներ եւ քաղաքական անձնաւորութիւններ ուղղուեցան Սեսին հրապարակ:

Այս առիթով Նետիմ Ժեմայէլ յայտնեց, որ իր հօր սպանութեան վերաբերող այս վճիռը պաշտօնական Լիբանանի եւ լիբանանեան պետութեան կողմէ վկայութիւն է` բոլոր նահատակներուն նկատմամբ:

Ան շեշտեց, որ նահատակները ինկած են Լիբանանի ազատութեան, անկախութեան եւ գերիշխանութեան համար:

Ան ողջունեց լիբանանեան պետութիւնը, յատկապէս Դատական իշխանութեան գերագոյն խորհուրդը, անոնցմէ պահանջելով նոյն ոճով եւ թափով շարունակել իրենց առաքելութիւնը եւ արդարութիւն բանեցնել նաեւ այլ նահատակներու ու անոնց ընտանիքներուն պարագային:

Սեսին հրապարակին վրայ տեղի ունեցած հաւաքէն ետք Պաշիր Ժեմայէլի ընտանիքն ու անոր հարազատները ուղղուեցան Պիքֆայա եւ Պաշիրի շիրիմին զետեղեցին արձակուած վճիռն ու ծաղկեպսակներ` ընդգծելով, որ Պաշիր ու անոր յիշատակը իրենց մէջ միշտ կենդանի է:

LEAVE A REPLY

Please enter your comment!
Please enter your name here