Ատրպէյճանական Զինուժը Կիրառած է «Սփայք» Հրթիռներ Եւ Ականանետեր

0
138

22 Հոկտեմբերին, Ատրպէյճանի զինուած ուժերը, խախտելով վերջերս ԵԱՀԿ Մինսկի խումբի համանախագահներուն միջնորդութեամբ Հայաստանի եւ Ատրպէյճանի նախագահներուն միջեւ Ժընեւի մէջ տեղի ունեցած հանդիպման ընթացքին ձեռք բերուած պայմանաւորուածութիւնը, հակամարտ զօրքերու շփման գիծի հիւսիսարեւելեան (Մարտակերտ-Մատաղիս) ուղղութեամբ կիրառած են հրետանային զինատեսակներ՝ հայկական դիրքերուն վրայ արձակելով ականանետի 5 արկ եւ «Սփայք» տեսակի մէկ հակահրասայլային հրթիռ:

Այս մասին կը յայտնեն Արցախի Հանրապետութեան պաշտպանութեան նախարարութեան լրատուական ծառայութենէն:

«Կատարուածը կը փաստէ, որ, ինչպէս միշտ, Պաքուն ոչ միայն հակուած չէ ձեռք բերուած պայմանաւորուածութիւնը նպատակաուղղելու հակամարտութեան խաղաղ կարգաւորման եւ չարդարացուած կորուստներու բացառման, այլ հակառակը՝ կանխամտածուած սադրանքներու միջոցով կ՛երթայ կացութեան ապակայունացման:

Հաշուի առնելով միջազգային հանրութեան եւ, մասնաւորապէս, ԵԱՀԿ Մինսկի խումբին կողմէ ատրպէյճանա-արցախեան հակամարտութեան խաղաղ կարգաւորման ուղղուած գործընթացներու արդիւնաւէտ իրականացման անհրաժեշտութիւնը, Արցախի զինուած ուժերը ձեռնպահ մնացած են պատասխան գործողութիւններէ: Սակայն ատիկա երբեք չի նշանակեր, որ դէպքերը նման տրամաբանութեամբ զարգանալու պարագային, հակառակորդի նախայարձակ գործողութիւնները անպատասխան պիտի մնան:

Արցախի Հանրապետութեան պաշտպանութեան նախարարութիւնը ամենայն պատասխանատուութեամբ Պաքուի ռազմաքաղաքական ղեկավարութիւնը կը զգուշացնէ, որ սադրանքները շարունակելու պարագային՝ պատասխանը անհամարժէք եւ բաւական ցաւոտ պիտի ըլլան», կ՛ըսուի հաղորդագրութեան մէջ:

LEAVE A REPLY

Please enter your comment!
Please enter your name here