Ընդդիմութիւնը Պարզանիի Հրաժարականը Կը Պահանջէ

0
126

ՍՈՒԼԷՅՄԱՆԻՅԱ, «Ա.Էֆ. Փէ.».- Հիւսիսային Իրաքի Քրտական ինքնավար մարզի նախագահ Մասուտ Պարզանիի ընդդիմացող Կորան քաղաքական կուսակցութիւնը, որ 111 աթոռ ունեցող շրջանային խորհրդարանին մէջ 24 երեսփոխաններ ունի, պահանջած է Պարզանիի հրաժարականը՝ դատապարտելով Քերքուքէն եւ քանի մը այլ շրջաններէ քրտական ուժերուն նահանջը։

Միւս կողմէ, ընկերային ցանցերու վրայ տարածուած տեսերիզ մը Շաբաթ օր ցոյց տուաւ Պարզանիի ղեկավարած Քիւրտիստանի ժողովրդավարական կուսակցութեան համակիր կարծուող անձեր, որոնք իրանեան դրօշը վար կ՛առնեն քրտական շրջանի մայրաքաղաք Արպիլի մէջ Իրանի հիւպատոսարանի շէնքէն: Իրանցի պաշտօնատարներ դատապարտած են արարքը՝ զայն «բարբարոսական» կոչելով:

Իրաքի արտաքին գործոց նախարարութիւնը եւս դատապարտեց իրանեան հիւպատոսարանին դէմ կատարուած յարձակումը՝ աւելցնելով, որ Պաղտատ կը դատապարտէ նաեւ Քիւրտիստանի ինքնավար մարզին մէջ այլ հիւպատոսարաններու եւ միջազգային առաքելութեանց ուղղուած սպառնալիքները: Նախարարութիւնը քրտական մարզին ղեկավարութիւնը պատասխանատու նկատեց հիւպատոսական առաքելութեան աշխատակիցներու ապահովութեան:

Յայտնենք, թէ մաս մը քիւրտեր նաեւ ցոյցեր կատարած էին Արպիլի մէջ Միացեալ Նահանգներու հիւպատոսարանին առջեւ։

Իրանի գերագոյն հոգեւոր պետի միջազգային հարցերու խորհրդական Ալի Աքպար Վիլայէթի յայտնեց, թէ Իրաքի վարչապետ Հայտար Ապատիի, կառավարութեան ու խորհրդարանին իմաստութեամբ՝ «առանց արիւնահեղութեան Քերքուքին վերատիրանալով վիժեցուեցաւ Իրաքը մասնատելու սիոնական դաւադրութիւնը»: Ըստ Վիլայէթիի՝ «Իրաքի քիւրտերուն ջախջախիչ մեծամասնութիւնը միացեալ Իրաք մը կ՛ուզէ՝ ի տարբերութիւն Պարզանիի, որ դուրսէն իր ստացած ծրագիրը կը գործադրէ»:

LEAVE A REPLY

Please enter your comment!
Please enter your name here