Ապատի Կը Պաշտպանէ Իրանի Աջակցութիւնը Վայելող Զինեալներուն Դերակատարութիւնը

0
148

ՊԱՂՏԱՏ, «Ռոյթըրզ».- Իրաքի վարչապետ Հայտար Ապատիի մամլոյ գրասենեակը հրապարակած է հաղորդագրութիւն մը, որուն մէջ ան զարմանք կը յայտնէ Իրանի աջակցութիւնը վայելող իրաքցի շիիներու զինեալ խմբաւորումներու համախմբումին՝ «Հաշիտ Շաապի»ի դերակատարութեան վերաբերեալ Միացեալ Նահանգներու արտաքին գործոց նախարար Ռեքս Թիլըրսընի յայտարարութեան առթիւ, միաժամանակ պնդելով, որ այդ զինեալները հայրենասէր իրաքցիներ են, որոնք բազմաթիւ զոհողութիւններ կատարած են իրենց երկրին ու իրաքցի ժողովուրդի սիրոյն, եւ խորհրդարանին որդեգրած օրէնքին հիմամբ՝ ենթակայ են իրաքեան ղեկավարութեան:

Նշենք, որ Ապատի Պաղտատի մէջ,  23 Հոկտեմբերին հանդիպում մը ունեցած էր Թիլըրսընի հետ, որ նախապէս չյայտարարուած այցելութիւն մը կատարած էր Իրաք՝ Սէուտական Արաբիա, Եգիպտոս եւ Յորդանան իր կատարած շրջապտոյտին ընթացքին։

Թիլըրսըն սէուտցի իր պաշտօնակից Ատել Ճուպէյրի հետ հանդիպումին ընթացքին կոչ ուղղած էր՝ «իրանեան զինեալ խմբաւորումները Իրաքէն հեռացնելու»:

Աւելի ուշ, Իրանի արտաքին գործոց նախարար Մոհամետ Ճաւատ Զարիֆ հակադարձած էր՝ ըսելով. «Ամերիկեան քաղաքականութեան համար ամօթալի է քարիւղի տոլարներու ցուցմունքին ենթարկուիլը»: Զարիֆ «Թուիթըր»ի վրայ հարց տուած էր. «Իրենք զիրենք պաշտպանելու համար «Իսլամական պետութեան» դէմ ոտքի կանգնած իրաքցիները ո՞ր երկիրը պէտք է վերադառնան»:

Միւս կողմէ, Իրաքի Քրտական ինքնավար մարզի ընտրական յանձնախումբը յայտարարեց, թէ 8 ամիսով պիտի յետաձգուին նախագահական եւ խորհրդարանական ընտրութիւնները:

Յիշեցնենք, որ Սեպտեմբերին Իրաքի Քրտական ինքնավար մարզին մէջ տեղի ունեցած անկախութեան հանրաքուէին մասնակցած քաղաքացիներուն 93 առ հարիւրը «այո՛» ըսած է անկախութեան, սակայն քանի մը շաբաթ ետք, իրաքեան պետական ուժերը եւ «Հաշիտ Շաապի»ի զինեալները գրաւած էին քարիւղով հարուստ Քերքուքը՝ լուրջ հարուած մը հասցնելով քիւրտերու անկախութեան ջանքերուն։

LEAVE A REPLY

Please enter your comment!
Please enter your name here