Հայաստանի Համար Սահմանուած Ռուսական Կազի Յատուկ Գինը Այս Տարի Պիտի Չփոխուի. Մետվետեւ

0
152

ԵՐԵՒԱՆ.- Պաշտօնական այցով Երեւան գտնուող Ռուսիոյ վարչապետ Տմիթրի Մետվետեւ Երեքշաբթի, 24 Հոկտեմբերին, Հայաստանի վարչապետ Կարէն Կարապետեանի հետ հանդիպումի աւարտէն ետք յայտարարեց, որ Հայաստանի համար սահմանուած ռուսական կազի յատուկ գինը այս տարի պիտի չփոխուի:

«Ամէն ինչ շատ լաւ է, մենք համոզուեցանք, որ բոլոր ուղղութիւններով յարաբերութիւնները աճ կ՛ապրին: Մենք ուրուագծեցինք ապագայի ընելիքները: Անկեղծօրէն շնորհակալութիւն Կարէն Վիլհելմովիչի հրաւէրին համար», յայտնեց Ռուսիոյ կառավարութեան ղեկավարը:

Պատասխանելով լրագրողի մը հարցումին, թէ ինչ քայլեր կ՛առնուին գիւղատնտեսական ոլորտէն ներս երկու երկիրներու յարաբերութիւնները զարգացնելու ուղղութեամբ՝ Ռուսիոյ վարչապետը պատասխանեց, որ քննարկուած են գիւղատնտեսութեան ոլորտէն ներս ներդրումներու եւ գիւղատնտեսութեան համար անհրաժեշտ սարքերու մատակարարման հարցեր: Ան ընդգծեց, որ այս ոլորտէն ներս կարիք կայ ջերմոցային տնտեսութեան եւ վերամշակման ուղղութեամբ աւելի լուրջ աշխատելու:

«Իսկապէս որ լաւ կերպով կը զարգանայ այս ոլորտը, համագործակցութեան հզօր հիմքեր ունինք, ներուժը շատ լաւ է: Նշեմ նաեւ, որ մեր մօտ յարգի են հայկական միրգերը: Մենք դեռ կը պահպանենք սահմանափակումներ երրորդ երկիրներէ գիւղմթերքի ներածումներու նկատմամբ, որպէսզի կարենանք ԵԱՏՄ մեր գործընկերներուն՝ յատկապէս Հայաստանիի հետ յարաբերութիւններ զարգացնել», ըսաւ Մետվետեւ:

 Ըստ վարչապետ Կարէն Կարապետեանի՝ հանդիպման ընթացքին ստորագրուած են շարք մը փաստաթուղթեր, որոնք կը նպաստեն երկու երկիրներու համագործակցութեան զարգացման:

«Նախեւառաջ մենք ամփոփեցինք կատարուած աշխատանքները, մեր յարաբերութիւնները դինամիկ (աշխոյժ-Խմբ.) աճ են ապրում: Միեւնոյն ժամանակ արձանագրեցինք, որ ահռելի հնարաւորութիւններ կան աճը աւելացնելու համար: Մենք բաւարարուած ենք կատարուած աշխատանքով, ինչպէս միշտ, խիստ կառուցողական եւ բարեկամական էին», նշեց Կարէն Կարապետեան:

Մեղրիի ազատ առեւտուրի տնտեսական գօտիի ստեղծման վերաբերեալ հարցումին պատասխանելով՝ վարչապետ Կարապետեան յայտարարեց, որ այս ուղղութեամբ բանակցութիւնները շատ լուրջ բնոյթ կը կրեն եւ մօտիկ ապագային հնարաւոր պիտի ըլլայ տնտեսական գօտին ստեղծել:

«Կարծում եմ՝ ազատ առեւտրի տնտեսական գօտին լաւ հարթակ է ռուսական կապիտալի (դրամագլուխի-Խմբ.) ներգրաւման համար», ընդգծեց վարչապետը:

Ռուսիոյ վարչապետը հանդիպեցաւ նաեւ նախագահ Սերժ Սարգսեանի հետ:

Նախագահը, ողջունելով Ռուսիոյ վարչապետը՝ յայտնեց. «Այսօր մեր յարաբերութիւններն առանձնանում են մշտական քաղաքական երկխօսութեամբ բոլոր մակարդակներում՝ արտաքին քաղաքական լայն կօօրդինացմամբ (համակարգումով-Խմբ.), միջազգային եւ տարածաշրջանային հարթակներում լաւ աշխատանքով, տնտեսութեան, ռազմական ու ռազմատեխնիկական (ռազմա-արհեստագիտական-Խմբ.) բնագաւառներում եւ յատկապէս փոխադարձ առեւտրի ոլորտում արգասաբեր համագործակցութեամբ. անցեալ տարին մենք աւարտել ենք 15 տոկոս աճով, իսկ ընթացիկ տարուայ ութ ամիսների ընթացքում մեր ապրանքաշրջանառութեան աճը 23 տոկոսից մի փոքր աւելի է: Դա շատ լաւ է»:

Մետվետեւ, իր կարգին շնորհակալութիւն յայտնեց նախագահին՝ ջերմ ընդունելութեան համար:

«Իսկապէս, մենք գործընկերներ ենք, բարեկամներ ենք, մենք ունինք շատ զարգացած յարաբերութիւններ բոլոր ոլորտներուն մէջ: Քիչ առաջ մենք ունեցանք միջկառավարական բանակցութիւններ, ստորագրեցինք կարեւոր փաստաթուղթեր, արձանագրեցինք, որ յարաբերութիւնները կը զարգանան: Գործնական առումով, չկայ ոլորտ մը, որուն մէջ մենք այժմ չենք համագործակցիր: Օրինակ՝ շատ լաւ աշխուժութիւն արձանագրուած է գիւղատնտեսական մատակարարումներու ոլորտին մէջ, եւ այստեղ Հայաստան լաւ զարգացուցախ է իր ներկայութիւնը ռուսական շուկային մէջ, անշուշտ կարելի է ապագային նոյնպէս այս գործընթացները զարգացնել: Այլ ոլորտները նոյնպէս լաւ կերպով կը զարգանան: Անոնք են՝ բարձր արհեստագիտութիւններու ոլորտը, անվտանգութեան եւ պաշտպանութեան ոլորտին մէջ համագործակցութիւնը եւ ներդրումային փոխգործակցութիւնը: Քիչ առաջ կը քննարկէինք Իրանի հետ համագործակցութեամբ ձեր մօտ ստեղծուող ազատ տնտեսական գօտիի տարածքին մէջ աշխատանքի հնարաւորութիւնը եւ շարք մը այլ մեծ ծրագիրներ: Ուրեմն, կ՛աշխատինք, կը համագործակցինք», ըսաւ Ռուսիոյ կառավարութեան ղեկավարը:

 

LEAVE A REPLY

Please enter your comment!
Please enter your name here